كيكة الفاصولياء السوداء

- كيكة الفاصوليا السودا

من اروع الكيكات الصحيه الي سويتها 

المقادير 

كوب فاصوليا سودا عضويه مستنبته 

نص كوب سكر جوز الهند العضوي 

اربع معالق بودرة كاكاو عضوية

ملعقة صغيره بيكنج باودر 

رشه ملح 

ملعقه صغيره فانيلا من غير كحول

اربع بيضات عضوية 

ربع كوب زيت جوز هند او اي بديل 

بالخلاط او محضرة الطعام اخلطوا كل المكونات من غير ترتيب شتبون اسهل.. وبروووم بروووم الا هي جاهزة.. صبوها بأي قالب واستمتعوا بالطعم اللذيذ

#وصفات_عليا_للحلويات

الغدة الكظرية

انا تعبانه 😢 

ليش شفيج؟ 

ما انام بالليل.. اتعب بالنهار.. جسمي تعبان.. هرموناتي خربانه.. زايد وزني وانا ما آكل.. كله معصبه واعصابي تعبانه.. ضغطي كله طايح وادوخ بس اقوم.. الصوديوم والبوتاسيوم مرتفعين بتحليل الشعر وقالولي اوقف ومامو فايده.. شنو فيني؟ 

فيج ارهاق غدة كظرية. 

شنو هذا بعد مو كافي درقيه الحين كظريه؟ 

اي نعم الغدة الكظرية.. الغده المهمله.. الغده المكروفه معانا كرف وللاسف الدكاتره مايعطونها ويه وحتى اخصائي التغذيه نفسهم عندهم قصور ومهملينها وعلاجهم لها خاطئ تماما. 

ونبدا الحلقه الاولى : شنو الغدة الكظرية؟

• الغدة الكظريه غده صغنونه فوق الكلاوي.. تفرز اكثر من خمسين نوع هرمون وكلهم مهمين جدا ومن أشهر هرموناتها : 

  الاستروجن والبروجستيرون والتستيرون

  الكورتيزول والكورتيزون 

  والادرينالين والدوبامين 

  حطيتلكم اكثر شي يتكرر عليكم سماعه. 

  المشكلة مو بس هذا وظيفتها بل هي الي تتحكم بدخول الصوديوم والبوتاسيوم الخليه (لذلك تحليل الشعر وخاصه النسبه بين الصوديوم والبوتاسيوم يعكس صحة الغدة الكظرية) والتوازن يرجع برجوع توازن الغده وليس بمنع طعام معين. 

  فاذا هي تتحكم بالصوديوم والبوتاسيوم يعني تتحكم بكل خليه ونسيج بجسم الانسان. 

  وهي الي تتحكم بمقدار السوايل واحتباسها وسرعة دقات القلب او بطئها وتنظيم السكر بالدم وقوة مناعتكم وقوة الحرق والتمثيل الغذائي (الميتابولزم) وحتى مشاعركم. 

  الغدة الكظرية تنقسم لقسمين.. القشره والباطن.. القشره تفرز اهم الهرمونات الاساسيه والباطن يفرز الهرمونات الغير اساسية. 

  من غير غدة قوية تفرز الهرمون بكفاءه بالوقت الصحيح فورا تظهر المشاكل الصحيه والجسميه والنفسيه. 

  شيصير فيكم اذا تأخرت الدوره؟ شيصير فيكم لو قمتوا فجأه ودارت فيكم الدنيا؟ شيصير فيكم لو قدامكم خطر بس ريولكم ما اعطت رد الفعل السريعه لتهربوا على سبيل المثال؟ 

  نعم هذي صورة مصغره علشان تتخيلون شنو ممكن يصير فيكم لو الهرمونات مانفرزت بكفاءه بالوقت المناسب.

• ارهاق الغدة الكظرية 1 

  اكثر شي يرهق الغده هو السترس والسترس ممكن يكون جسدي /عضوي /نفسي.. يؤدي الى اختلال توازن الجسد.. فلمن يحصل خرعه او خوف اول شي يستثار بالجسم الدماغ فترسل الغده النخاميه رساله للكظريه يلا ياماما بسرعه اشتغلي.. ومع استمرار حث الدماغ للغده علشان تفرز الكورتيزول (مضاد للالتهاب) 

  The cortisol is anti inflammatory hormone. 

  تبدأ الغده بالارهاق. ومن غير لاندري ممكن نفرزه طول اليوم.. شلون؟ 

  اسهل شي اذا عندكم حساسيه خفيه. 

  شرب القهوه والشاي الي الكل مفكره عادي هو اهم اسباب ارهاق الغدة. 

  الصدمات القوية.. حادث.. فقد حبيب.. خرعه

  الامراض العضوية الداخليه.. كلى كبد قلب.. الخ

  حتى مرضاتنا الموسميه تأثر 

  ضغط العمل.. مشاكل بالعمل

  مشاكل البيت مع الزوج مع الزوجة

  التدخين 

  الجروح العميقه

  الرياضه قلتها وكثرتها

  العوايد الغذائيه الخاطئة 

  قلة النوم 

  النفسيه السيئة (الخايسه) الي كله مكشر ومو عاجبه شي 😂😂 ترا بيذبح عمره بايده لاتتهاوشون معاه. 

  
  

  وبالتالي تبدأ الغده بالارهاق وعدم افراز جيد لباقي الهرمونات والنتيجة الامراض. 

  
  

  لذلك كل مواضيعي النفسيه الاخيره.. اياكم والحزن اياكم والتعلق بشيئ بهالدنيا.. اياكم والقهوه والشاي تستخدمونها فقط كدواء.. اياكم والكبت.. اياكم والعصبيه.. واخذوا اجازات من العمل ومن الزوج ومن الاولاد شوي بس مو وايد 😂.. اقعدوا بروحكم شوي.. طلعوا كل مشاعر كره وبغض وتسامحوا وتصالحوا.. غيروا جو كل شوي مع احبابكم.. اكلوا صحي.. خل لكم روتين معين لاتصدمون اجسامكم كل يوم مخربينها.. للاكل وقت وللنوم وقت وللشغل وقت لايزيد ولاينقص..خل العيال يخربون لاتعصبون (وايد تحسنت 🙈).. ابتعدوا عن الادوية قدر الامكان والتدخين.. حتى لمن تشتغلون لازم يكون مكان مرتاحين فيه وحاولوا مايكون فوقكم ضوء فلورسنت.. ولا تعيشون في الجيم وترهقون اجسادكم تراه يذبح نفس نسبة عدم الرياضه. 

  يتبع..

• ارهاق الغده الكظرية 2

  
  

  ماهي علامات ارهاق الغده؟ 

  عدم استقرار سكر الدم 

  مناعه منخفضة 

  ارق ليلي.. واحيانا تنامون وتقومون الساعه 2 جذي والجسم مايقدر يرجع ينام. 

  انخفاض ضغط الدم المفاجئ لمن تتحركون من مكان او توقفون فجأه.

  الجلد يصير رفيع وناشف. 

  تصبغات جلديه. 

  الحاجة الملحة لاكل الملح 

  تغير اماكن تجمع الدهون من الارداف الى البطن. 

  طيب شراح يصير بالجسم ساعة افراز الجسم للكورتيزول؟ 

  
  

  اول شي راح يصير لمن تفرز الغده هرمونات السترس راح يوقف الهضم والعصاره الهضمية.. وراح يبعد الدم عن الجهاز الهضمي علشان يحميه.. منو الشاطر الي يقول لي منو القسم المتحكم بالهضم بالدماغ ومنو الي لازم يسيطر 😁؟ المهم لمن يوقف الهضم الاكل راح يتخمر وراح يغذي الميكروبات وبالتالي البكتيريا النافعه تموت والسيئة تنتعش وتسبب التهاب الغشاء المخاطي للامعاء المزمن وبالتالي مشاكل القولون والارتشاح الليكي غات والحساسيات. 

  ثانيا: الكورتيزول راح يثبط المناعه وبالتالي الجسم يتعرض للأمراض والبكتيريا والفايروسات ومايقدر يقاومها. 

  وضعف المناعه يخلي الجسم عرضه للكانسر. 

  ثالثا : خساره كمية كبيره من المعادن والفيتامينات والحاجة الملحة لهم.

  لان ارهاق الغده مو بس لانها تفرز هرمونات وايد بل احيانا لانها مو لاقيه مغذيات كفايه تصنع فيهم هرموناتها.. لذلك التغذية هي رقم واحد بحل كل المشاكل. 

  رابعا : السترس راح يسبب شد عضل وخاصه حوالين الرقبه وصداع وممكن يسبب نقص وصول الدم للدماغ 

  Ischemia

  
  

  خامسا: السترس راح ياثر على انتاج السيروتونين بالدماغ وبالتالي الاحباط 

  Depression 

  وحب الكربوهدرات (رساله طبيعيه من الجسم لزيادة السيروتونين) 

  سادسا: راح يخسر الجسم عدل ويزيد الدهن ويتخزن بالوسط وتنحف الاطراف ويكبر من عمر الجسم. 

  سابعا: راح تأثر على انتاج هرمونات الغده الدرقيه 

  الحل...

• الحل كالعاده هو نظام شامل متكامل وليس حبة دوا.. النظام الغذائي:

  😂😂 وصلت لحلم حيااااااتي.. ممنووووووووووع القهوه والشاي وكل شي فيه كافيين.. ممنوووووووووووووع 

  آه الحين ارتاحت نفسيتي 😎

  
  

  لازم يكون الطعام مكون من اكل غني بالفيتامينات والمعادن كامل غير مكرر ولا منزوع الفايده.

  لحد يقول لي قطعت منتجات الزنك.. الزنك اهم مكون بكل خلية بجسمنا وهو المسؤول عن انقسام الخلية ومضاد اكسده عالي وهو المسؤول عن الهرمونات.

  
  

  لازم الاكل يكون ذو رقم غلايسمي منخفض وهذا شرحته وبشرحه قريبا. 

  غذاءكم وبروتينكم لازم يكون كامل. 

  ابتعدوا عن اي محليات صناعيه ومواد حافظه واضافات صناعيه. 

  لازم تشربون ماي بكمية كبيره. 

  زيادة الالياف وخاصه الاوراق الخضرا. زيادة قلوية الجسم. 

  زيادة مضادات الأكسدة. 

  الخضره عموما كلها مهمه ولكن الثوم والبصل اقواها. 

  كل شي غني بفيتامين الف وسي وباء 

  كل شي غني بالزنك بالسلينيوم بالمنغنيز والنحاس والمغنيسيوم 

  الدهون الاساسية الصحيه. (ارجعوا لموضوع الدهون). تغييرات حياتيه بسيطه :

  النوم الجيد الكافي 

  دايما حطوا روتين مرتب ليومكم من نوم واكل وراحه. 

  رياضه باستمرار.. مو قوية ومرهقه.. شي يتناسب مع قدراتك.. ويريح اعصابك. 

  انا انسانه اذا نطيت ارتاح غيري اذا رقص زومبا وغيري اذا سوى يوغا.. اختار الي يناسبك. 

  حاولوا السيطره على اعصابكم وقلقكم. 

  تعرضوا للشمس.. روحوا كزدوره العصاري قبل المغرب.. او عقب شروق الشمس.

  تقوية مناعتكم.. راجعوا حسابي وحساب دكتور باسل اقروا عن الايرثنغ وعن الفرشاة الجافه والتنفس العميق.. وعن الطعام الي يبني ويقوي المناعه (ذوي امراض المناعه الذاتيه ينتبهون).

  يتبع..

الرديولا.. من اجمل الاعشاب عن تجربه.. لكن محتاجة دعم غذائي ونفسي. 

تعطي طاقه وقوه نشاط صباحا وهدوء وراحه للمساء... لاتؤخذ الا بالنهار.. وتكملونها بالليل مع اعشاب مهدئة نفس البابونج والينسون والناردين وغيرها من اعشاب مهدئه ماعرف اسماءهم بالعربي :

Skullcap / passionflower / catnip

والي يساعد على بناء الغدة :

الجنسنغ السايبيري / عرق السوس / والشزندره. 

ابحثوا عن كل شي واقروا اكثر.. شوفوا شيناسبكم وشنو يتعارض مع ادويتكم. 

والاهم البحث عن الاطعمه المسببة للحساسيه والامتناع عنها. 

ربي ينفعكم جميعا.

ومع تجديد ملحوظتي الدائمه لست عشابه وماقدر ارد على استفساراتكم.. انا اعطي الخيوط والحلول والباقي عليكم. 😊❤

بشاركم قصتي 😊 ادري تحبون القصص.. طبعا عرفتوا قصة حساسيتي وشلون اكتشفتها.. ولكن للاسف كنت كل فترة اكتشف شي جديد.. عقب ماكانت بس اسماك وقشريات بحرية.. صرت اكشف اي شي فيه MSG

اي شي فيه اضافات غريبه كيماوية الوان.. اي منتج حليب غير عضوي.. لان مارح تصدقون كان جسمي يصيد الهرمونات الي فيه او المضادات الحيويه.. لاني بس اكل زبادي عضوي ماكان يصير فيني ولاشي.. حتى الزبيب المرشوش سولفايت اصيده.. الكاجو السمسم.. فتحت الحساسيات على البحري 

فقررت اول ما ارجع كندا عقب سفرة الكويت انظف جسمي عدل وبالفعل سويت الكانديدا دايت.. التجربه الي شاركتكم فيها من فترة.. وبفضل الرحمن كل هالقوائم الي فوق ☝ راحت.. والسمج قمت اكله.. بس بقى زيت السمج لانه ممكن مخلوط بقشور بحريه جسمي ماقدر عليه.

المهم طبعا خلال هالسنه خسرت عضل.. كسبت دهن.. خسرت اول مسابقه رياضيه بحياتي وماخذيت ولامركز.. ادائي نزل.. سرعتي بالركض خفت.. صار مالي خلق اتدرب.. ولا حتى احضر وجباتي لانه تعب عالفاضي 

وبديت اغوص بالقراءه والبحث الين وصلت للغده الدرقيه كانت ماعندي عوارض قويه الا الضغط يطيح وضربات القلب تطيح واذا تمرنت تطلع بقوه.. وطبعا عدم نزول الوزن..و تغير شكل جسمي 

وماهتميت وايد لان حياتي طبيعيه 

ولكن... وماجذب عليكم صدمة بنتي هزتني.. مو خوف والله اناحزنت اول يومين لكن تعبت بحث وقراءه وشنو افضل تحاليل ماكنت انام.. شفتوا اعصار المواضيع الخاصه بالاسنان والزئبق والنيكل ..حراره طاقه بجسمي لازم اطلعها..ولمن خلصت.. جسمي تقريبا انتهى.. الغده قالتلي انا مو كافي مستحملة حساسيتج والكورتيزول مطشر ترهقيني ببنتج فانفجرت فيني ارهاق وارق ودوخه لمن اقوم من النوم لازم امسك الطوفه علشان لا اطيح.. وهوب مرضاتي الي هدوا حيلي عقب طبعا ما مناعتي انتهت.. فتعرفت اكثر على غدتي واتصاحبنا ورجعت اغذيها عدل ودعمتها بالراديولا صباحا.. احس بانتعاش معاها.. وبالليل كوب لافندر وبابونج 

رشيت ميتابو لان فيها اشواغاندا نفس مفعول الجنسنغ وفيها استراغالوس يقوي المناعه والاثنين مضاد اكسده وشوية تحابيش. وآخذ الويت غراس ديتوكس طبيعي. 

وآخذ مكملات لان السترس ينضب مخزون الجسم من المعادن.. ولكن ماقدر اشارككم لان كل جسم مختلف باحتياجة.. وممكن تضركم ماتنفعكم. 

جربت الريحان المقدس شاي التولسي.. ماحبيت ردة فعل جسمي له نهائيا ووقفته. الحين حيل مرتاحه بفضل الله ❤ بس باقيلي سترس واحد لازم احله 😢.. وهذي قصتي الاخيره عساها تنفع احد