نبدأ تقرير رحلتي لمصانع ألبان في مزارع الياسمين ـ الوفرة ـ الكويت مع السيد لاري المدير
رحلتنا كانت سهلة الحمدلله والطريق سهل جدا.. مدخل جميل..
وبعد البحث لقينا السوبر ماركت.. المكان جميل جدا والمنتجات رائعه ولكن كالعادة السعر مبالغ فيه لكثير من المنتجات.
حبيت فكرة قدرتنا على رؤية مصنع الالبان وطريقة صنع الاجبان.. المكان نظيف حيل ودرجة التعقيم عاليه جدا وهذا شي رائع بالرغم من ملاحظتي لهدر كمية كبيرة من المياه.. لكن هذا مو اختصاصي.
حجزنا غولف كار لاستكشاف المزرعه.. ماشاءالله مرتبه ونظيفه.. المشاتل رائعه وحظاير الحيوانات نظيفه والرائحة جدا طبيعية مو مؤذية.
وبعد الكثير من الأسئلة الي مالقيت اجوبة لاكثرها كان التالي :
بخصوص الابقار:
- ماهي تغذية الابقار؟
الابقار تاكل علف وذره وصويا
- هل لازم تغذونهم بحبوب مع ان البقر غذاه الحشايش؟
هذي التغذية العادية المعتمده مع كل المزارع الكبيره.. واحنا في الشرق الاوسط وبمنطقة صحراوية مارح تلقين ابقار تتغذى عالاعشاب او ابقار ترعى رعي حر.. بس ممكن تلقين ماعز وابل.
- هل الحبوب معدلة جينيا؟
ماعنده علم
- هل تعلم اني قيمت حليب بقركم بصفر؟
احترم رايج بس ظلمتي حليبنا لانه الاجود.. ولكن عدم وجود الطعم الي انتي متعوده عليه يعود لاختلاف تغذيته. انا للحين مالقيت في جوده تفرقه عن غيره!! احنا حليبنا مافي مواد حافظة وعمره فقط اسبوع على الارفف.. ومو هومو جنايزد نفس باقي الانواع.
Non_Homogenized
- شلون اذا انتو كاتبين ستاندرايزد؟
Standardized
لأ اكو فرق بين الاثنين
- شالفرق بين الهومو والستاندرايزد.. انا اعرف ان الهومو هو معالجة الفات بحيث مايفصل عن الحليب وخاصه في الحليب الكامل الدسم بس شنو العملية الثانية؟
الثانية نخفف فيها الدهن بحيث يكون بالمعيار المطلوب وهو بحدود الثلاثه ونص.
- انزين وشخبار البستره؟
احنا نعقم حليبنا بدرجة حرارة بحدود الخمسة وسبعين لمدة ثواني ونحاول قدر الامكان مانلعب بالحرارة.
- يعني ماعندكم الالترا؟
لأ
- انزين انت تعرف ان بالبستره تضيع كل فوايد الحليب؟
لأ ماقدر الا اتبع القانون
- انا معاك ان مصنعكم كبير وله سمعه لازم يمشي على القواعد الأساسية في صناعة الحليب علشان ضمان الصحة.. ولكن في ناس ماتبي مبستر وتبي تشرب حليب طازج فرش ولكن تبي تطمن من نظافة وصحة القطيع وسلامة تخزين الحليب الني.
للاسف مانقدر.
- انزين انت كمدير شرايك بالفكره...سو محل جانبي او بنفس المعرض بيع حليب ني تحت الطلب وتحت مسؤولية المشتري بس بشرط نشتريه بنفس التعقيم والنظافة الي تتبعونها في مصنعكم.
فكره جميله ودام انتي حيل متأذية من الحليب انا حاضر اختاري الحجم الي تبينه وانا اعبيه لج حليب ني.
- للاسف الشديد كان كل المخزون رايح للبستره ومالي نصيب بشي . انزين انا ادري ان مجهودك كبير وصناعة الحليب مسؤولية كبيرة ولكن لازلت اسأل شلي يميزكم اكثر؟
احنا حلمنا يوصل الحليب فرش يوميا لباب البيت وحققناه الحين تلقين الحليب معصور الصبح نبستره ويصير بالسوق بنفس اليوم وبعمر جدا قصير..مع ان عمره الفعلي اطول.
- مستر لاري ماتتوقع سعركم مبالغ؟
للاسف انا مالي ايد بالتسعير.. ولكن اذا تبين شي جيد لازم يكون سعره عالي.
- شكرا لك ولوقتك.. ورحابة صدرك للاجابه على اسئلتي.
الملخص :
انا انسانه احب اجرب واحب اعتمد الافضل لعيلتي.. واحب اشوف الشي بعيني علشان يتطمن قلبي.. واسأل وايد.. وللاسف العرب للحين ماعندهم ثقافة ان المستهلك من حقه يعرف كل شي بالتفصيل الممل.. لان الصحة هي ثقافة راح تزيد باذن الله وراح يلقون مئات مثلي يبون يعرفون شنو قاعدين ياكلون ويشربون.
شركة ألبان شركة كويتية ولنا الفخر.. نظيفه ومافيها مواد حافظة ومو معالجة بحرارة عالية.. اما التطبيب والتغذية فهي مثل اي مزرعه تجارية تمشي على القوانين وعلى اساسيات زيادة الانتاج.. لم يذكرلي أحد خلو غذاءها من الهرمونات.. ولم ينفي احد خلو غذاءها من التعديل الجيني..الاسعار جدا مبالغ فيها بحيث تعطي المشتري الاحساس بقيمة المنتج وانه فرق عن الباقي..وخاصه مع التعليب الكوول.. هل معناها الشركات الثانية افضل؟ ماعتقد فالكل ماشي على نفس المبادئ.
?
ليست هناك تعليقات:
إرسال تعليق