هذا السؤال الي يقتلني.. شنو فايدة اكل الخيار؟ شنو فايدة الرمان؟ شنو فايدة المانغا؟
ما اجاوب على هالسؤال بالرغم من اهميته لان ادري خلف هالاجابه غلط شنيع راح يطيح فيه سائل السؤال.. وهو باستهلاكه المبالغ بهالشي الي سأل عنه.
يعني لو اخصائية او اخصائي شرح اهمية اكل معين خنقول كتان.. راح كل الي قرا الموضوع وخلص عالكتان الي بالسوق.. ليه لان فلان/ة قال ممتاز.
فلان/ة ماقالكم اكلوه كل يوم بكميات كبيره.. وين التوازن الي دوم انصح فيه؟
انصح فيه وابح صوتي بعد لاني انضريت ومابي ولا واحد فيكم ينضر.
الاكل كله صحي مافي شي يعلى على شي وخاصه لو كان في بيئتكم.. وعضوي وطبيعي الافضل.. ومحضر بطريقه صحيحة.
ومن الأسئلة اللي اسمعها دايما
اذا كل شي مو زين يعني شنو ناكل؟ نموت؟
اكثر جملة ترفع ضغطي..
كل يوم اقراها والغيها وألغيها وألغيها.. وآخذ نفس عميق واكمل طريقي.
طيب السؤال التاني البريئ …حطيلنا البدائل.
ليش احطلكم البدائل دام احطلكم المبادئ؟
منو اهم المبادئ ولا البدائل.. المبادئ تخلي مخيلتكم اوسع ومجال ابداعكم اكبر
كل شي بهالدنيا ربي حلله علينا فهو حلال خالص.. متى يصير مشكلة لمن الإنسان يغير هالشي الحلال النافع لشي ماينفع الا جيبه.
هل هذا كل شي؟
لأ ويكون هالحلال كامل من غير نقص.. يعني لامشيول قشرته ولا مخففين دهنه ولا ناقص منه شي.
وتكون كمية هالحلال ضمن المعقول وعلمنا عليها الحبيب عليه افضل الصلاة والسلام.. ثلث للطعام وثلت للشراب وثلث للنفس وأن لا نأكل باسراف.
هذا التوب.. اعلى درجات الصحه الغذائية.
تدرون ان في ناس ماتاكل الطحين وان اكلته لازم من حصادهم ومطحون فورا بايدهم.
تدرون ان في ناس ما تاكل زيت الزيتون فقط تاكل الزيتون او تعصره بارد بايدهم وتستهلكه بفترة جدا صغيره.
تدرون ان في ناس ماتاكل الا الي يطلع بأرضها وماياكلون شي حصدوه ثاني يوم ولا ياكلون ثمر طايح على الارض.
الصحه ومعناها واحد لكن فهمها وتطبيقها مختلف.
انتو شنو تختارون التزمت ام الوسطيه والاعتدال ام الاهمال؟
انا اخترت بحياتي الوسطية.. اغلط واصلح واتعلم واكمل..اسمع جسمي شنو يبي وشنو مايبي.. اجرب اتعلم اكثر واحاول جاهده مثلكم بالضبط
ترا انا مو بمنفى وقدامي مغريات ووايد احيان اغض البصر
ليست هناك تعليقات:
إرسال تعليق