الدهون
الدهون
رابع اهم مكون بالجسم بعد الماي والكربوهدرات والبروتين.. اهميتها كاهميتهم ولكن بنسبه اقل منهم.
الدهون موجوده باللحوم بالحليب ومنتجاته بالمكسرات والبذور وغيرها.
انظلمت كثيرا لانها اسهل مصدر للدهون المخزنه وبالتالي السمنه وامراض القلب وبعض انواع الكانسر.. متناسين ان كثرة الكربوهدرات ايضا تتحول لدهون يعني مايصير نلوم الدهون بروحها.
وسبب ثاني لالقاء اللوم عليها انها تعطي كالوريز اعلى من الكربوهدرات والبروتين..يعني كمية صغيره تعطينا طاقه عاليه جدا.. فبالتالي مانحتاج كمية كبيره منها وخاصه اذا استخدامنا لهالطاقه قليل.
ولكنها فعاله ورائعه لو استخدامنا للطاقه عالي.. فالجسم اول مايخلص خزان الطاقه من الغلايكوجين الي تخزن من الكربوهدرات يدور فورا الدهون.
هل الطاقه هو الشي الوحيد الي ناخذه من الدهون؟
لأ هو الاساسي ولكن في فيتامينات ماتنتقل الا بوجود الدهون لانها فيتامينات ذائبة بالدهون.. الدهون هي المكون الاساسي لجدران الخلايا بالجسم والانسجة الداخليه الي تحمي الاعضاء من الصدمات والحراره...وحتى تحافظ على توازن حرارة الجسم.
يعني لازم ولابد اجسامنا تخزن دهون ولكن الزيادة او النقصان كارثه.
وفي شي مهم جدا وخاصه بالدهون وهو اهمية النوعيه وليست الكمية..وهالشي ما انتبهوا له الا حديثا جدا بعد صرعة الفات فري الي بهدلت الناس بدال ماتعالجهم.
شنو اقسام الدهون الاساسيه؟
دهون مشبعه / غير مشبعه (أحاديه وثنائية) /متحوله
ومثل ما البروتينات كان فيها الأحماض الأمينية وهني بالدهون فيها الاحماض الدهنيه والي على اساسها نقسمها.
وهني بتوقف واشرح بتفصييييييل.. ليش لاني ابي اجهز جيل واعي فاهم شلي قاعد ياكله ومو يسمع كلمة اخصائي ولا دكتور ويوقف الدهون المشبعه بحجة انها ترفع الكولسترول.
يلا ركزوا معاي
Saturated fat الدهون المشبعه
قصيرة السلسة 2_ 5
Short chain fatty acids (SCFA)
Acetic acid / propionic acid / butyric acid / valeric acid
متوسطة السلسلة 6_12
Medium chain fatty acids (MCFA)
Caporic acid/caprylic acid / capric acid / lauric acid
طويلة السلسلة اكثر من 14 رابط
Long chain Fatty acids (LCFA)
Myristic acid/palmitic acid/ stearic acid
عليا ليش دوم تأذينا باسماء مارح نقدر نحفظها؟ ?? علشان اوصل لنقطتي لازم احط المعلومه كامله.
شفتوا هالدهون المشبعه هذي كلها.. كلها مهمه للجسم.. وخاصه المتوسطة السلسلة وهي اكثر دهون قامت عليها دراسات التغذيه.
المهم وصلنا ان اكثر نوع قامت عليه الدراسات هو الاحماض الامينية متوسطة السلسلة... فيها نوعين من اهم انواع الدهون سريعة الامتصاص.. ماتحتاج للجهاز اللمفاوي ولا الكبد وهي :
Caprylic acid / capric acid
كانوا من خمسين سنه يعالجون فيه الناس الي عندها صعوبة امتصاص الدهون.
ولكن إلى عليه كلام هو حمض اللوريك.. انه يرفع الكولسترول الغير جيد
Ldl (low density lipoprotein)
ولكن اثبتت الدراسات الحديثه اهميته وسرعة امتصاصه واحتواءه على كالوريز اقل من الباقيين اهوا واخوانه من الاحماض الدهنية المتوسطة السلسله
It has 8.3 calories rather than 9 calories per gram
وهذي الدهون هي الموجوده في زيت جوز الهند وزيت النخيل (غير المكرر). يعني شفتو هالثلاث انواع بكل مافيها.. بالاضافه للدهون الغير مشبعه بانواعها الجسم مايقدر يشتغل من غيرهم.
فبأي حق يقدر دكتور يمنع مريض من استهلاك الدهون المشبعه.. بحجة الكولسترول؟
لعلمكم الدهون المشبعه هي الدهون الاكثر استقرارا يعني ما تتأكسد بسرعه وتكون سموم حره نفس الزيوت الغير مشبعه.
زين شنو سبب الجلطات؟
السموم الحره هي اساس الجلطات وامراض القلب.
شلون انا اشرحلكم
جابوا جلطة وفحصوها ولقوا انها كولسترول فقالوا خلاص السبب الدهون المشبعه.. لكن هل صج كانت بس كولسترول؟
تعالوا ندخلكم اوردة قلب ? مريض.. فهو اما يشرب سجاير فيتعرض لكمية رهيبه من السموم الحره.. او انسان طبيعي بس ياكل دهون متحوله او متأكسده ومكرره او اكل محروق فتدخل جسمه كسموم قاتله..او مريض سكر بحالات متقدمه.. هالسموم الحره بغض النظر عن مصدرها تجرح الاورده.. وكرد فعل سريع يكون الجسم جلطات علشان يصك الجرح فتلقط كل شي بطريقها .
فلما فحصوا الجلطات لقوا من مكوناتها :
Dead macrophages (immune cells)
خلايا مناعيه ميته تكونت للدفاع عن الجرح من السموم.
هالاجسام المضاده والتجلطات الي تتكون علشان تصك الجرح تكون
Rough scar tissue
ولان الكولسترول دبق فيلزق على هالتجلطات فيسد الوريد ولكن الكولسترول كان مؤكسد.
لو الكولسترول السبب كان صك الشرايين أيضا .. تراه يمر هني وهناك.
الدكاتره بالضبط سوت شنو خل نوقف الكولسترول علشان لانشوف هالطبقه.. زين شرايك نوقف مناعة الجسم علشان لاتكون الجلطات وتدافع عن نفسها؟؟ لغوا كل اهمية الكولسترول المفيد بالجسم بسبب بحث من سنة الف وخشبه مبني على رأي ضعيف.
وللعلم الكولسترول الغير جيد يتكون من الكربوهدرات المكرره مو من الدهون.. فاتقوا الله فينا وفي مرضانا.
الي ابي اوصله.. وجب على كل اخصائي تغذية ودكتور يراجع الدراسات الاخيره بخصوص القلب.
ومهم جدا توعية الناس بالسبب الفعلي لانسداد الشرايين.
السموم السموم السموم
الزيوت النباتيه المكرره : كانولا / ذره / دوار شمس / زيت الزيتون النقي وغيرها الخاصه بالقلي
زيت الكانولا والذره والصويا وعباد الشمس والنخيل المكرر الي بالسوق باسعار رخيصه فيها احتماليه تكون معدله جينيا وهذا يعني انفلاميشن اكبر بالجسم ككل.
والي يقول هالدراسه صارت عالفيران مو البني ادميين اقوله شوف الناس حواليك وشوف صحتهم وانت تعرف هالدراسه صحيحة او خاطئه واذا ماتبي تصدق استهلكهم انت حر انا علي نفسي واي شخص حاب يعرف من وين الخلل.
وفي نقطه ان هالزيوت النباتيه تنحرق وتتأكسد بسرعه فلازم تتعالج وتتكرر وهالشي يغير من تكوينها فتكون الدهون المتحوله trans fat
غير ان القلي فيها اكثر من مره يزود الطين بله.
مافي ولازيت يستحمل قلي مثل السمنه.
لازم يمنعون الزيوت المهدرجة وما يسوون دعايه لها انها صحيه وبديل صحي للدهون المشبعه الحيوانيه.
لازم نرجع لمبادئ اجدادنا ماياكلون الا الزيوت المعصوره عالبارد.. ويقلون بالسمن الحيواني.
منع الكربوهدرات المكرره والسكر اساس الكولسترول الضار.
واخر نصيحة لابد الانتباه من الكمية لان طاقة اجدادنا كانت عاليه وانتو حدكم الصاله والمطبخ فوجب التنويه..
طيب عليا احنا مانبي دهون مشبعه عادي؟
ادري اني انا وكل اخصائي يعترف بمبدأ ان الدهون المشبعه بريئة من الجلطات وتكوين الكولسترول الضار.. وما نقدر نغير فكرة انزرعت صارلها اكثر من ثلاثين سنه.
بس دايما اطلب منكم العوده للاصل.
وماقدر انصح بالابتعاد عن اي مكون اساسي في اجسادنا وهو الدهون...اذا ماتبي دهون مشبعه حيوانيه مافي مشكله اخذها نباتيه ربي خلق الاثنين.. ولكن اكثر تحمل للحراره بلا منافس الدهن المشبع الحيواني.
شفتو الصوره الي فوق ??.. هذا هو الفرق بين الدهون المشبعه والغير مشبعه.. شوفوا تماسك المشبع وليونة الغير مشبع انزين خل نفرق بينهم.
الدهون المشبعه :
اقل تفاعلا مع اي جزيء في الجسم.
تحتوي على بنية (هيكل) مستقر هو الي يعطي للخليه صلابة الغشاء .
اما الدهون الغير مشبعه:
اكثر تفاعل مع الجزيئات الثانيه بالجسم وبالتالي تتعرض للتخريب اسرع.
ولكن أهميتها تعطي صفة الليونة لغشاء الخلية علشان تتحرك بحريه وسهوله اكثر.
من نعم الله علينا ان الجسم لمن ينحرم من الدهون المشبعه لتكوين الكولسترول الاساسي من الجسم.. الكبد يضطر يكونه علشان دورة الحياة تستمر.
بس هذا مو معناه راح يقل خطر تعرضك لامراض القلب.. راجعوا الموضوع السابق.
شنو خطوات الحفاط على الزيوت من الاكسده؟
عصر الزيوت النباتيه عالبارد من غير تعريض الزيوت النباتيه للحراره العاليه.. طبعا في جداول تظهر درجة احتراق الزيوت فاذا تعرفون تطبقونها كان بها اذا لأ فاكلوها بارده.
حفظها بحافظات زجاجية غامقه اللون ومحكمة الاغلاق.. لانها تتأثر بالاكسجين والضوء والحراره.
في ناس واصله مراحل متقدمه انها اذا تبي تستفيد من الشي تاكل اصله.. يعني اذا يبون فوايد الزيتون ياكلون الزيتون نفسه مو زيته.. الافوكادو نفس الشي.. المكسرات.. وغيرها
طبعا هالمبدأ صح بس مو عملي وخاصه انها افضل فكره لاستغلال المحصول الفائض للشي.. وان كثير من العلاجات تحتاج مستخلصات هالنباتات المركزه.
ولاتفكرون وايد ويصير عندكم هاجس السموم الحره.. لان السموم موجوده حوالينا بكل مكان وعلاجها باستهلاك مضادات الاكسده.
ليست هناك تعليقات:
إرسال تعليق