رحلة الحياة
رحلتي :
مابطولها وايد ولكن بحطلكم اهم النقاط فيها :
التغيير في حياتكم لازم يتم بمراحل وليس مره واحده
التشجيع من الاهل وايد مهم وانا ربي رزقني تشجيع زوجي.. الله يخليه لي وما يمل يارب..
الرياضه شي اساسي بحياتكم نفس الاكل والماي
الحياه فيها فوق وتحت لازم تتعلمون تواجهونها بذكاء ومو تعاقبون انفسكم
حبوا انفسكم بتواضع وشجعوا الاخرين
يعني مو لازم اذا نجحتي تكتمين معلوماتج علشان فلانه لاتقلدج.. بس بنفس الوقت مو كل شي ضبط معاج يضبط على غيرج
اكتشفت بهالرحله ان كل جسم له خصوصيته ومختلف اختلاف كلي عن اي شخص ثاني.. فلا تقارنون انفسكم بأحد ولا تنطرون نتيجة مشابهه لاحد
حبوا الخير للكل من غير حسد لو تدرون شكثر تعب هالانسان علشان يحصل هالنتيجة الي قاعدين تتمنونها باللسان فقط من غير فعل
اكتشفت ايضا ان جودة الاكل تريح الجسم وتضبط وظايفه ولكن ممكن يمتنك.. وبالفعل مرت علي فترة زاد وزني ورجعت التوازن بالتحكم بالكمية.
بعد هالثلاث سنين احس ماعاد الاكل يهمني نفس اول.. اكل لاسد جوعي وليس لتضييع وقتي.. ممكن بس هرموناتي تلعب فيني لكن احاول قدر الامكان اتحكم فيها
...
اكتشفت ان حسبتي غلط.. ان اكل سبعين بالامية صحي كفيل يحمي جسمي من الامراض للاسف خطأ يا اما اخذها اميه بالاميه او عالاقل ما اكثر من شي فيه شك انه ممكن يسبب مشاكل او ذو محتوى عالي من السموم .. والسبب نظافة الجسم من الداخل يخليها عرضه اكبر للسموم وللحساسية .. الانسان الي كل حياته خرابيط جسمه عنده مناعه اقوى تغلف جهازه الهضمي لمنع امتصاص هالسموم ولكن بنفس الوقت منع امتصاص الفوايد الغذائية للاكل.. يعني الي بيقول لا يبا خلنا مو صحي ابرك لنا اقوله اهلا بك في عالم الامراض الشاسع.
يعني الاثنين معرضين ولكن استهلكوا الاكل بذكاء.
انا للاسف من جم شهر تعبت حيل واكتشفت اني فقط لمن اكل سمك ومشتقاته اتعب ورحت حللت طلع التحليل سليم.. وهذا دليل قاطع ان التحاليل ماتظهر الحساسيه في بداياتها.. كونوا انتو محللين اجسامكم وخاصه اذا نظامكم مرتب وتعرفون شلي دخل اجسامكم.
ومن اسبوع يتلي ازمة بقلبي محد درا شالسبب وتحاليل وتخطيط الخ الخ
فراجعت نفسي تذكرت اني شاربه سوبر غرين سموثي فيه سبيرولينا.. يعني ممكن هي تكون اساس حساسيتي.
شغلات كثيرة نحس انها مفيده وهي بالفعل مفيده ولكن تذكروا اول النقاط الي ذكرتهم ان كل جسم غير عن الثاني الي ينفع لهذا يمكن ماينفعلك.
ولاتستهلكون شي حتى وان كنتوا تحبونه بكمية كبيرة.. انا كنت اكل سمك يوميا.
هل هذا سبب يخليني اوقف؟ اتنازل عن مبادئي؟
طبعا لأ دام في هالجسم قلب يدق مكملة طريقي باذن الله
اذا الواحد ياكل صحي صارله سنتين وهو بالاصل صارله ثلاثين سنه ياكل خربوطي فهل نظلم الاكل الصحي ولا عوايدنا القديمه الي دمرت اجسامنا؟! ??
لان في ناس ناطرة امرض او يصير فيني شي لتثبت ان الاكل الصحي ما منه فايده ????
تذكروا انه لن يصيبنا الا ماكتب الله لنا ولكنك مسؤول عن أمانة صحتك وتكلمت عن هالموضوع كثير.
لا تخلون احد يحبطكم.. حاوطوا انفسكم بالمبدعين والمتفائلين.. اي نعم انا عمري اثتين وثلاثين سنه وللحين ابجي وازعل واتضايق وكل مره ربي يدزلي احد يشد عزيمتي ويقويني
....
نكمل الرحلة الي غيرت حياتي وحياة عائلتي وهذا الجزء الاخير باذن الله.. انا انسانه عجوله واعصب وازعل بسرعه ولكن تغيرت اكثر من خمسين بالاميه.. قمت اواجه المشاكل بهدوء اكثر من غير عصبيه ولكني قمت اخذ قرارات جذرية وما كنت اجرؤ اخذها.. هل الاكل الصحي هو السبب
اي نعم في رابط قوي بين شخصية الانسان واكله وما اكتشفته الا حديثا....بل ورابطه جدا قوي بالإحباط والخمول والاجهاد . تذكروا هالحديث.. ما ملأ ابن آدم وعاء شراً من بطنه.. هالحديث يعطيكم فكرة ليه الناس ابتعدت عن الدين.. ليه الناس صارت أخلاقها بشعه.. كله معصبين كله ضايق خلقهم كله متمردين.
بفضل الرحمن مقدار التوتر كان عندي عشره من عشرة الحين اثنين او حتى صفر.. ماقدر اقول بس اكل بهالنقطة لا لكن ايمان بأن مافي شي لهالدنيا راح يصيبنا الا لخير حتى وان زعلنا من هالشي. ولازلت اشتغل على هالنقطه علشان باجر افيد عميلاتي باذن الله وابعدهم عن خرابيط الطاقه والخزعبلات الي يمتصها الناس بسهولة.
واخر شي سؤال ينطرح علي شكلج رشيقه وبرفكت لا يبا لا رشيقه ولا شي وماعرف انزل وزني حتى مع كل المسابقات والبطولات الي دخلتها والسبب اني مختصه بالاكل الصحي وليس النحافة.. نحفت اي نحفت بس مو للدرجة الي نقدر نقول عنها ممتازة..
ليست هناك تعليقات:
إرسال تعليق