هل يقدر النباتي يعضل؟

هل يقدر النباتي يعضّل؟ 

.. ويه عليا انتي بأي عصر؟

 كل النباتيين معضلين وفايزين بمسابقات كمال اجسام وانتي تقولين لأ؟! لا ادري وحبيت استفزهم شوي ???? اي الحين يقدرون بس اول ماكانوا يقدرون .. تعالوا بفهمكم السالفه باختصار.

النظام النباتي( فيجان) نظام رائع يخلي الانسان مفعم بالحيوية والنشاط والخفه.. هذا غير انه خفيف عالمعده وحل امثل للناس الي عندها مشاكل بالهضم.. وفيه مضادات اكسده رائعه.. ولذيذ مطبوخ او ني.. وكله انزيمات.. وطبعا ممكن الاستلذاذ بالمكسرات والبقول والبذور بكل انواعها فيه. 

انزين وين المشكلة؟ 

ربي من نعمه علينا خلق النبات والحيوان.. ناخذ من هذا وشوي من هذا او بالاصح ناخذ المتوفر في بيئتنا الطبيعيه.. لمن درست عن الشعوب القديمه وبالذات المعمره الكل بلا استثناء ماكان نباتي وكان اقل اقل اقل شي يشربون الحليب او اللبن المتخمر يعني الزبادي الروب وياكلون لحم وبيض متى ماتوفر لهم .. واهالي البحر ياكلون السمج وهلم جره. 

يعني خذوا حاجتهم من الكربوهدرات والبروتين المتكامل والدهون الطبيعيه. 

ابي شخص نباتي ماياخذ مكمل غذائي.. ها يلا هاتولي؟! مافي ومستحيل.. لازم ينتبه على الحديد والكالسيوم والزنك وفيتامين دال وبي اثنعش.... اها وانا عندي مبدأ كل نظام غذائي يدخل فيه سابلمنت اساسي هو ناقص. 

بالاضافه ان البروتين النباتي غير كامل.. ولازم لبناء الجسم والعضلات وغيرها وجود الخلطه كاملة 

لاحظوا اجسام النباتيين اما متان لانهم ياكلون نظام غذائي عالي بالسكر والكربوهدرات او جسم هزيل لعدم استطاعته بناء العضل في جسمه.

بس الحين من بو عشر سنين ظهر النباتي المعضل بو جسم متناسق شالسر؟ غير الصويا الي ياخذونها علشان يلحق على احتياجه ظهرت الخلطات الرياضيه المركزه من تخمير او استنبات الرز او الهمب او البازيلا وغيرها من خلطات.. يجففونها ويركزونها ويعادلونها بحيث تعطي بروتين كامل مقارب للحيواني.. هل هذا زين او شين؟! برأيي اي شي زاد عن حده انقلب ضده واي شي مركز بدرجة عاليه بهالطريقه الغير موجوده على ارض الواقع فأكيد مو تمام.

بس عليا شوفي أجسامهم صحيه وكلها عافيه ومافيهم شي!! تذكروا ان جسم الإنسان له قدره عاليه في الحفاظ على توازنه ومستعد ياخذ من مخزون عافيتهم الي بنوها بسنين قبل التحول للنظام الصارم.. وتذكروا ان لابد وياخدون مكملات علشان يحافظون على صحتهم. 

وتذكروا ان ممكن يجذبون عليكم ليثبتوا افكارهم وماتدرون شيسوون من وراكم ??????.

.................................

الاجابه :

نعم يقدر ولكن لابد من مساعدة المكملات الغذائيه. 

الي يتابعني يعرف شكثر احب النظام النباتي.. احبه لذيذ يريحني ويعطيني طاقه ونشاط وخفه وخاصه قبل التمرين الصباحي.. ادائي يكون فوق الممتاز 

لكن مابي اخذ مكملات وانا اقدر اخذها فقط بشربي للبن او اكلي للحم النظيف او البيض من دجاج صج متربي عالعز والدلال مو مثل الدعايات ????

اعتدلوا جزاكم الله خير هو الحل. 

لاتقولون حرام ذبح الحيوان.. منو قال ربي رزقه لنا رزق حلال.. لكن ارفضوا وبقوة كل تربية خاطئه للحيوان تؤدي لامراض تأثر علينا وعلى صحتنا. 

اياكم والاسراف اياكم والاسراف.. وهالرزق بيكون غذاء ودواء باذن الله. . 

واحترم رأي كل شخص فاكيد لكل واحد سبب خلاه يلجأ للنظام النباتي الصارم.. وكل نباتي له الحق يعرف طرق تخليه يستمر باللي اهوا قاعد يسويه لو هو لازال مقتنع فيه.. والحياه صارت سهله الحمدلله.. ولكم حرية الاختيار.

.......