عدوى وعلاجها
تجربة
تجربتي مع مرضتي الاخيره.. يارب تنفعكم
المرضه مامرت علي بحياتي كلها.. هالمره شي مختلف.. لو تذكرون بنتي اول من مرض وعالجتها بالاوريغانو وزيت خاص بالاذن بالمناوبه مع ايونات الفضه اقل تركيز.. بالضبط يومين وقامت.
وراها ابني الكبير وكان علاجة نفس الشي.
وجاء الدور على امهم فكانت مختلفه وقوية لاقصى حد.. التهاب حاد بالحلق وانتفاخ باللوز وتورم شديد بالعقد اللمفاويه في منطقة الرقبه .. ارهاق وألم بالمفاصل.. بديت العلاج كل ساعه بالتبادل اوريغانو /ايونات فضه / غرغرة بماي دافي وملح
الليمون قتلني.. شاي الزنجبيل بالليمون والعسل صك ماتبقى من الحلق.
كل شي اتصك بحلجي.. رحت الدكتوره اخترعت من منظري.. وقالتلي باخذ عينه منكم كلكم.. وخذت من الي اتشافوا والصغار.. المضحك المبكي.. ان الاثنين الي اتعالجوا سليمين ????
والاطفال الي للحين ماظهر عليهم مصابين.
طبعا كلنا مصابين بنفس البكتيريا لكن استخدامي للعلاج قبل حضوري للدكتوره ماخلى البكتيريا تظهر لها بالتحليل.. وهالشي طمني اني ماشيه صح الحمدلله.
ولكن الالم شي فظيع.. كنت ابكي اذا بلعت ريقي فمابالكم لمن كنت اخذ العلاج او اشرب او آكل.. عقب ثلاث ايام من عدم الاكل والشرب صابني جفاف حاد والم بالكلى.. فحولتني عالمستشفى اخذ دريب.. وانا ادري ان ممكن أصلح هالشي.. ماعندي احد ينتبه على عيالي فرفضت وقتلها خلاص باخذ مسكن وبعدل كل شي باذن الله.
وبالفعل اعطتني اقوى شي خذيت حبه.. واول مابدا الخدار دخلت كل شي اقدر عليه وفورا الآلام خفت بفضل الله.
وتميت استحمل الالم علشان لا آخذ اي حبوب زياده.. وبفضل الله عقب خمس ايام بديت اكل واشرب بالم بسيط.. وصار الاوريغانو مخدر رائع بهالوقت.
وعيالي الصغار الحمدلله خلصناهم بس باقي شوية رشح خفيف وكحه.. فدخلت الالدربيري العجيب.
والحين فترة نقاهه واعاده تأهيل.. فيتامين سي وزنك /غلوتاثيون /بروبايوتك / فحم.
حيل منتعشه وانام براحه بالليل بفضل الله.
والعوده للرياضه بكل تأكيد ?
المهم لو تقدرون على الثوم والفلفل الكايين فهو علاج ممتاز ويقصر من وقت الالتهاب.. ولكن اذا مثلي ماتقدرون تهضمونهم.. فالاوريغانو والايونات رائعين.
لايخوفونكم الدكاتره بتروح عالقلب والكلى الخ .. بكل بساطه الاوريغانو والايونات هم مضادات حيويه طبيعية قويه.. تقوي المناعه بنفس الوقت تقتل البكتيريا..اما المضاد راح يقتل البكتيريا ومناعتكم ويعرضكم لنفس العدوى من جديد.
ويارب محد يعاني منها ??
الجزء الثاني
الي يتابعني يعرف اني ما احط منتج بعينه لان يمكن يتوفر بالسوق منتجات اقوى لكن انا اشتري المتوفر بسوقنا المحلي.
اول سطر هو زيت الاوريغانو.. اقوى مضاد حيوي رائع لاحتقان الحلق
انا استخدم لاطفالي المنتج الي عاليمين فوق.. تركيز
36% carvacrol
يحتوي على فيتامين اي ومخفف بزيت زيتون عضوي.
واعتماد على نصيحة اختي @holistic_house
شريت الي عالشمال بتركيز اعلى
80% carvacrol
ايضا يحتوي على فيتامين إي ومخفف بزيت زيتون عضوي.
الاثنين ممتازين ولاطفالي اعتمدت اول واحد لانه اخف عليهم ويحبونه.. الثاني حيل قوي عليهم لكن ساعدني بفضل الله بمرضتي.
شراب الالدربيري :
خالي من الكحول.. مع ان الي بكحول اقوى بوااااايد ??
عباره عن توت الالدربيري مخلوط بعبكر نحل (بروبولس) وزهور الخمان (الالدرفلاور).. مخلوط بعسل نحل عضوي غير مبستر وخل تفاح عضوي.
ماينعطى للاطفال اقل من سنه.
مفيد لحالات اابرد والكحه بالذات واحتقان الحلق والحراره.
وآخر شي ايونات الفضه.. هذي ايونات جدا خفيفه وفعاله بتركيز
10ppm
قدرة الجسم على التخلص منها عالي جدا.
ولكن مع العدوى الاخيره لازم آخذ بنصيحة استاذ باسل واستخدام اقوى تركيز
200ppm
بس الحمدلله مرت علي خير بالتركيز الخفيف وجسمي باذن الله تخلص منه بسهوله.
حق اهلنا بالكويت اختي @holistic_house.. ماتقصر بتوفير أفضل المنتجات.. ربي يبارك لها في تجارتها.
والبحرين اختنا @tasty_brand_organic_
موفقين يارب كلكم.
...
ليست هناك تعليقات:
إرسال تعليق