التعديل الوراثي أو الجيني
التعديل الجيني او الوراثي هي عملية حدثت منذ الازل لتحسين المحاصيل الزراعيه
شكانوا يسوون؟ يلقحون النبات بمحصول غني بالطعم والشكل والانتاج علشان تعطي ثمره اجود بطعم افضل.
للحين مافي مشكلة لانها طبيعية ومن نبته لنبته.
لكن التعديل الوراثي الحديث شي مختلف تماما.. دخلت الحبة المختبرات للاسف ولعب فيها الانسان الي دوم يفكر انه بينقذ البشرية بعقله الفذ.
خذوا الجينات الخاصه بالدي ان ايه وحقنوها في جينات محصول اخر.. هل من نفس نوع المحصول؟! للاسف لأ بل ممكن من بكتيريا /فايروسات/حشرات/حيوانات/نباتات/او حتى انسان.
ولذلك في امكانية كبيرة انها تكون حرام شرعا..ودليلي قول الله تعالى يا أيها الناس كلوا مما في الأرض حلالا طيبا.. وللاسف ممكن التعديل يجعله يخالط حرام ويجعله غير طيب غير صحي.. بس مابدخل في هالموضوع سامحوني.. لانه شائك ومافي شي تاكلونه الا في ماده او اكثر معدله وراثيا.. الموضوع كبر جدا وصعب السيطره عليه.
انزين ليش يسوون هالشي.. ليش يعدلون الجينات.. تتعدل الجينات لعدة اسباب.. بس مابقولها كلها بخرعكم ببعض منها
طماطم معدله بحيث تنتج مبيد حشري طبيعي تقتل الحشرات اللي تهاجمها ومو بس جذي وتوفر على المزارع رش المبيدات.
ابيكم تتخيلون اذا تقتل الحشرات وتطردها شراح تسوي فينا؟! مثال ثاني.. الدول الفقيره انتشر فيها الامراض بس ماتقدر تطعم الاطفال.. خلاص خل يزرعون هالفواكه المعينه من هالبذور المعدله وبس ياكلونها ياخذون التطعيمات
والله من صجي مو غشمره هذا الكلام من موقع
Learn Genetics
مثال ثالث.. العالم الثالث الفقير بافريقيا مايقدر يزرع المحاصيل مافي ماي.. اوكي نسويله محاصيل تستحمل اقل قدر ممكن من الماي وحتى المالح مافي مشكلة
وبهالحجه قالوا ان التعديل هو انقاذ للعالم.. وشركة مونسانتو
Monsanto
اهيا البعبع الكبير بهالمجال ومحد قادر لها.. وتدعم كل الي يشترون منها وطبعا كل مصانع الاكل الي تخطر ببالكم يتعاملون معاها او مع المزارع الي داعمتها.. والي يوقف ضدها توديه ورا الشمس.. والدليل محد قادر يمنع التعديل وكل القرارات الي نطالب فيها لمنع التعديل او عالاقل نعرف اذا هالمنتح معدل.. مرفوض
لذلك قام مشروع
Non GMO project
ووقف معاه المزارعين البسيطين.. وبعد ضغط المستهلكين( السلاح الاقوى) بدت حتى الشركات الكبيره تاخذ هالعلامه
طبعا في ناس لمن تسمع هالكلام بتقول خلاص انتوا بتموتونا ماناكل شي يعني.. مافي غير تحبطونا الخ الخ الخ
انا للاسف اذا احد طلب مني معلومه فلابد اني اكتبها كامله.. وابدا ما احبطكم بس ودي الوعي ينتشر.. واذا انتشر الوعي محد بيقص عليكم.. انتوا اقوى سلاح انتوا المستهلكين.. يمكن هالضجة ماوصلت لكم نفس عندنا.. بس لابد توصل لان دول الخليج بالذات هي اكبر مستورد وداعم للمحاصيل الامريكية.
من فترة شفت صفحة بانستغرام لمزرعة ماعز وكان يفتخر انه يطعمي قطيعه افضل علف امريكي عالي البروتين من الالفافا.. قلتله هل تحس بهالشي الي كتبته بانك تطعم قطيعك افضل اكل.. وفهمته قصدي ان العلف الأمريكي الي يصدرونه للخارج اكثره معدل جينيا.. ونقلت لكم خبر رفض الصين للعلف الامريكي واحنا نفتخر
ما اعاتب هالمزارع ولكن عدم الوعي بخطورة هالشي اهوا السبب.
صديقه لي ماصدقت ان بضاعة السوق في كندا معدله.. قلتلها تعالي.. تجربة بسيطه جدا راح تثبتلج هالشي.. شريت بطاطس عاديه وبطاطس عضويه
وخليتها عندي بالمطبخ خلال جم يوم كانت العضوية متبرعمه البراعم الخضرا والثانيه ولا صارلها شي
قطعنا البطاطس بالوسط خلال دقايق كانت العضويه سودا والثانيه ولا صارلها شي شديدة ويابسه ولونها واحد.
تهقون هذي بطاطس طبيعية؟! احنا شركاء بهالجريمه ترا.. نبي كل شي بيرفكت وتغيرت نظرتنا للاكل الطبيعي الي مفروض يعفن ويخترب بسرعه ويذبل ويتغير لونه وطعمه وهيئته.
واخر سؤال دوم ينطرح علي شلون نعرف ان هذا معدل.. مافي اي دليل ومافي اي قرار سمح بهالشي يصير.. وغدا لناظره قريب.. لذلك انا فرحت بهالقرار
التعديل الجيني ماله مفعول سريع ولكن مضاره تاخذ سنين وسنين من ارهاق الجسد في سموم بطيئة المفعول.. اتمنى اكون اعطيتكم صورة مختصره واضحه عن الموضوع
وطبعا بتلقون مدافعين عن هذا الانجاز البشري العظيم.. فادعوا لهم ان ربي ينور بصيرتهم.
وتذكروا( قل لن يصيبنا إلا ما كتب الله لنا ) بس لا تستسلموا للبشر فقط لقدر الله
ليست هناك تعليقات:
إرسال تعليق