الطحين المستخدم : حنطه مستنبت وطحين اسمر كامل واينكورن ثلاث اكواب ونص
ربع كوب زبده للعجين او زيت
ربع كوب عسل
وماي للعجن تقريبا كوبين
وقطعه صغيرة خميرة طبيعية.
عجنتها الصبح ورحت سويت كم شغله بو ساعتين وشوي رجعت لقيتها متخمره بقوه عجنتها وفردتها وحطيت عليها الزبدة البارده
250 g
بالعاده بوصفتي العاديه اقلل الزبدة وازود عدد اللفات وهذا الي سويته بوصفتي هالمره
والتبريد اول بأول بصفايح ثلج
بعد مافردتها الفرده الأخيرة وقسمتها حطيتها تتخمر اكثر.. الوقت الكامل من البداية للنهاية كان قريب الست ساعات علشان اخلي البكتيريا تاخذ راحتها وتشتغل صح.
اخر شي حميت الفرن ودخلت الصواني الفريزر بس تزود برودتها
وحطيتهم بالفرن.. كل مره انسى ازود صينية تحت الصينية الاصلية لان اول صينية بسرعه انحرق الجزء السفلي.
والثانيه اشوى لحقتها.. المهم خليتهم بحدود خمسة وثلاثين دقيقه او اكثر نتوفه.
وفتحت اول وحده لانصدم انها طلعت صمونه.. انزين يالطيبه مني مناك انا سويت كرواسان يعني طبقات .. ولكن خانتني وصارت صمونة.
ماجذب عليكم خفيفة ولذيذة والعسل مسوي شغل.. والتفاح لزيز لزيز.. ولكن انا لها باذن الله.
الخطه القادمه تزويد الزبده واستخدام نوع واحد فقط من القمح الكامل.. لان ممكن السبب استخدامي للمستنبت والاينكورن الاثنين مافيهم الا شوية غلوتن والتكتشر مالهم مختلف تماما عن القمح العادي.
ليست هناك تعليقات:
إرسال تعليق