ولدي يحك شعره..
وتبدا الام تبجي وتنوح.. ما اعتب عليها ماشفتوني وانا بالكويت لمن اختي قالتلي بنتك يمكن فيها شي.. ابجي وكأن احد ذبح عيالي
وقمت انا بعد احك واحك وابجي وكل يوم اروح لاختي تشيك شعري تقولي مافيج شي.. واخر شي طلع من الشامبو لانه مو عضوي الي متعوده استخدمه بكندا.. وبس غيرته وكأن شيئا لم يكن
من هالتجربه ابيكم تتعلمون درس مهم.. استقبال الموضوع بهدوء.. ولدي يحك شعره.. اشوف هل في شي ابيض صغير.. هل هالشي الابيض لازق ولا قشره.. هل في شي يتحرك وخاصه ورا الاذون وعند الرقبه .
اذا طلع نعم.. خذوا نفس عميق.. لا مانع من البكاء قليلا.. علشان تطلعون السترس . بسم الله نبدأ.. اول شي بتفكرون فيه هو الأدوية الكيماويه الي بالصيدليات او الدكتور راح يوصفها لكم.. لكم حرية استخدامها بس تذكروا ان السموم راح تمصها فروة راس عيالكم وتتأثر فيها.
استخدموا ادوية اقرب للطبيعية مصنوعه من الزيوت الطيارة واقل مقدار من المواد الكيماويه او انتوا اصنعوا زيوتكم وهذا الي بعلمه لكم بخلط زيوت نفس زيت شجرة الشاي او زيت الكافور واللافندر والاوريغانو كلها طاردة للقمل.
القمل ماله شغل بنظافة الشعر او عدمه بل ممكن حركته تكون اسهل بالشعر النظيف يقدر يلزق بسهوله عكس الي عليه زيت.
العدوى حيل سهله من راس الى راس وخاصه الاطفال بالمدارس او الحضانات ومن ثم الى اهاليهم او استخدام الادوات الشخصية للغير مشط.. كبوس.. هلمت وغيرها.
القمل مايجي من الحيوانات فالبق مختلف عن قمل الشعر.. مصدر الحياة الوحيد للقمل هو دم الانسان.. ولانهم مايطيرون لازم يلزقون بشي ويكون مكان دافي للتكاثر ووضع البيض وطبعا افضل مكان واسهلها الشعر.
القمل مايقدر يعيش اكثر من يوم من غير لايتغذى فحركته تكون سريعه جدا عن طريق القفز وبعض الاحيان الزحف.
فالوقايه اهم من العلاج في الدرجة الأولى :
ترتيب شعر الاولاد في المدرسه حيل مهم.. توصيتهم بعدم الاقتراب من رؤوس اصدقاءهم.. وعدم مشاركتهم اغراضهم الشخصيه.. لا امشاط.. لا كبابيس ولا حجابات.. اي شي ينحط على الشعر او الرقبه.
تفتيش الشعر فورا اذا حك الولد قشرة راسه.. او تشييك بين فتره وفتره.
الحل الأهدى هو رش شعر اولادكم الصبح بالزيوت الطياره.. نعم ريحتها قوية بس ممكن تلطيفها بزيوت ثانيه تخفي ريحتها بل وتقوي فعاليتها.
اقوى خلطه هي التالي :
Tea tree oil / lavender oil / peppermint oil/castor oil
زيت شجرة الشاي مع زيت اللافندر وزيت النعناع وزيت الخروع.. وهذا طارد وليس قاتل.
يعني لو لاسمح الله صاب احد عيالكم بسرعه رشوا شعرهم بهالخلطه اكثر من العاده وبالمشط الرفيع شيلوا اي بويضات ممكن تكون لازقه بالشعر.. وباذن الله مابتلقون شي.
اضيفوا لشامبو اطفالكم نفس الخلطه او فقط زيت شجرة الشاي عليه.
وافركوه عدل.
فكره ثانيه حلوه.. جل طبيعي او زيت جوز هند مضاف عليه خلطة الزيوت السابقه.. ومسجوا فروة الراس عدل بحيث ماتخلون لها مجال تتغذى وتختنق من الريحه.. لفوا الشعر وصكوه ببلاستك الشاور.. وبعدين غسلون عدل ولمن ينشف بالفرشاه الرفيعه وباذن الله بيكون حل فعال
طبعا بتلقون دراسات تقلل من فعالية هالعلاج علشان بتوقفون سوق الكيماوي القاتل للقمل.. انا ما انكر ان كل النتايج كانت اقوى للكيماوي لكن عيالكم امانه وانتوا ادرى بمصلحتهم.
\
اقوى علاج طبيعي :
خلط جل الصبار مع زيت الخروع وزيت شجرة الشاي بمقدار متساوي.. ثم اضافة اي زيت طيار متوفر عندكم.. كل شي ينفع
كان زيت ليمون زيت اوريغانو زيت روزماري الخ الخ
عمل مساج لفروة الرأس ثم اغلاقها لمدة ساعتين بالشاور كاب
ولزيادة الاطمئنان وازالة اي بويضات بالفرشاة ذات الاسنان الرفيعه.
ممكن عمل رشاش بنفس الطريقه بس مع اضافة الماي بدال الجل.. وهذا بيكون حمايه ممتاز
كل العلاجات الي تعرفوها من استخدام بخاخ من الخل المخفف تنفع، اهم مافيها انها طبيعية.. ماعليها اي خلاف.. فاللي متوفر عندكم استخدموه.
وهذا دليل ان الموضوع بسيط ونجاحه فعال من غير اي مواد كيماوية
?
ليست هناك تعليقات:
إرسال تعليق