الماء

الماء 

من أهميته ماقدر ادش اي موضوع من غير ما اتكلم فيه.. درس اليوم الأول هو سر الحياة.. قال تعالى: وجعلنا من الماء كل شئ حي

بكل بساطه ماده من ثلاث جزيئات اثنين هيدروجين وواحد اكسجين .. اذا اتحدت اعطتنا اهم ماده للحياه وهي الماء

H2O

جسم الانسان فيه 

60% ماء

ولكن اكثر من 80% لمن نكون اطفال

وين هالماي موجود؟ 

هو المكون الاساسي للدم.. للسائل اللمفاوي.. للعصارة الهضمية.. للبول.. للدموع.. والعرق. 

مو بس هو مكون بل كل عملية حيوية بالجسم ياتحتاج ماي ياتنتج ماي كالحركة الدموية.. الهضم.. الامتصاص.. والتخلص من السموم.

وتحمل فيها املاح المعادن الاساسيه لتوازن اجسادنا.. الصوديوم والبوتاسيوم والكالسيوم والمغنيسيوم والكلوريد. 

تخيلو شكثر اجسادكم تتعذب لو ما عبيتوا خزان اجسامكم من مياه نقيه؟! ارخص دواء ممكن تفكرون فيه هو شرب ماء عذب كافي ليغذي اجسامكم باحتياجاته ليستمر بالعطاء بكفاءه. 

انزين شكثر نحتاج؟ 

12 كوب عالاقل 

بس في وايد شغلات تعلي هالكمية.. المناخ.. النشاط البدني.. صحة الجسم لو عنده حراره او اسهال وغيرها

انتبهوا ان بعد ماناكل اي شي ينتج ماي.. معدل البني ادم الطبيعي يطلع بو اربع او خمس اكواب ماي من الاكل او هضمه (منتج اخير). بس باقي للحين سبع الى ثمان اكواب. 

الغالبية مايشربون ماي نهائي واذا يعني تذكر يلا كوبين. 

ومن هني تبدا المشاكل جسمكم يضطر يسحب الماي من كل مكان ويسبب جفافكم. 

لاتنسوا ان بعض المشروبات نفس القهوه والشاي تمص من اجسادكم ماي اكثر لانها مدره للبول.مع كل كوب قهوه تخسرون كوب ماي وانتو تحتاجون بو سبع ثمان اكواب ماي صافيه.. يعني زودتوا احتياج اجسامكم اكثر ?? 

واذا شربتوا صودا على بو انها ماي ترويكم.. للاسف المحتوى العالي للسكر يحتاج ماي اكثر لتذويبه.. فاجسادكم راح تسحب ماي اكثر علشان تقدر تميع هالتركيز العالي

هل ممكن نشرب أي نوع ماي؟

في الدول المتقدمة والغنية مع كل ماعندها الا ان عندها  قصور كبير في العلم.. مابي اقول خطه علشان يخلصون منا عالبطيء ولكن قصور علمي كبير. 

الحكومة الكندية والأمريكية تشجع المواطنين شرب مياه الحنفيات دايركت من غير فلتر لجودتها ونقاوتها. 

للاسف الشديد ماي الحكومه ماي مكرر ومعالج.. غير طبيعي:

فيه كلورين لقتل البكتيريا.. فلورايد لقتل البكتيريا ووجدوا فعاليته في منع تسوس الاسنان

فيها مواد قلوية لتخفيف حموضة المياه علشان لاتخرب انابيب الصرف مثل مادة هيدروكسيد الكالسيوم

انابيب الصرف نفسها تطلع معادنها في الماي نفس النحاس والرصاص

فيها جراثيم وبكتيريا قويه مايخترقها الكلورين

الكلورين نفسه ممكن يتفاعل مع المواد العضوية الي فيها وغير ضارة ويحولها لمواد ضاره مسرطنه نفس مادة هيدروكربونات الكلورين. 

طبعا في منظمه شغلتها تراقب هالسموم ومقدارها (كلامي بخصوص شمال امريكا) .. واهيا الي تحدد يخففون ولايزودون 

EPA (Safe drinking water Act (SDWA) of 1974)

ولكن بالرغم من هذا اثبت بحث في هارفارد ان مقدار صغير من الفلورايد بمعدل 

1ppm

واحد جزء من المليون يأثر تأثير سلبي على دماغ الاطفال 

Developmental Fluoride Neurotoxicity: A Systematic Review and Meta-Analysis

للاسف الدراسات علشان تثبت سمية الشي لازم يجربون على بشر مو فيران لمدة زمنية طويله ويكون هالشي فقط هو التركيز عليه.. وطبعا هذا مستحيل ??. لان لو هالمجموعه الي سووا عليها دراسه تسممت.. ممكن يعترض اي احد بكل سهوله ويقول يمكن هالشخص تعرض للمادة السامه من الجو او من الاكل او من الاثاث الخ الخ الخ

فالشي المثبت ان هالمواد المضافه سامه جدا.. ولكن يتحججون بان لابديل لها للصحه العامه وان هم مراقبين النسب بدقه عاليه ??. طبعا كلام خرطي لان ممكن اجيب امثله وايد لتسمم فعلي في مناطق كثيره في امريكا وغيرها بمياه المفترض تكون اميه بالاميه سليمه.

الحل.. هل نروح نشرب ماي من الابار او الانهار او البنابيع دايركت؟ 

للاسف بعد كمية هالحروب ومخلفات المصانع ومخلفات المزارع كل هذا ينرمي باقرب مصرف ماي او نهر.. فصارت المياه الي مفروض تكون الاكثر امانا هي الاكثر خطرا. 

في منظمه امريكية اسمها 

ATSDR The Agency for Toxic substances and Disease Registry 

كل سنه تعطي تقرير عن مدى سمية المياه والتربه والهواء للحكومه الامريكية فتلقى مواد مرعبه. 

اكثر مواد مرعبه لنا وتتواجد حتى في مياه الشرب هي 

الرصاص .. الزئبق والزرنيخ.. وغاز الرادون هو ماده من اليورانيوم تكون بمياه الابار بجانب مصانع الطاقه النووية .. والنيترات الي اكثر شي يلقونها في الابار بجانب المزارع الي يستخدمون المبيدات الحشرية ومضاد الاعشاب. 

مانبي نطولها عليكم افضل حل هو الفلاتر ولكن مافي شي ممتاز كل شي له عيوب ومميزات ويتم عليكم بالاخر الاختيار

فلتر الكربون :

هو اكثر شي مستخدم وسعره في متناول الجميع.. الفحم يعالج الماي مبكانيكيا وايونيا بحيث يشيل اي ريحة او لون او طعم من الماي لانه يسحب البكتيريا.. وايضا يقدر يسحب الديدان واكثر الفايروسات.. يسحب الكلور وكل المعادن الثقيله.. ولكن المعادن الخفيفه نفس الفلورايد والكائنات الحيه الدقيقه مايقدر يشيلها.. وللحين مو اكيد اميه بالاميه انه يشيل الرصاص والزئبق. 

وايضا لمن يحبس الديدان والبكتيريا مايقدر يشيلهم فيتمون داخل الفلتر ويمكن يتكاثروا.. الحين في نوعين نوع مضغوط ونوع فيه فراغات.. وابو الفراغات يحبس البكتيريا ولكن قابله للتكاثر بهالفراغات واعادتها للماي.. فحطوا فضه ولكن الفضه معدن سام يعني بنشرب فضه كل يوم بكمية غير معلومه؟! مانبي نعقدها 

نروح للحل الثاني :

فلتر بالتناضح العكسي 

Reverse osmosis 

تشتغل بالضغط.. تضغط الماي بحيث تدش بفلاتر متعدده ماتسمح الا لجزيئات الماي بالمرور تاركة وراها كل شي ثاني.. واخر شي يختمها بفلتر كربون.. عيبهم غاليين عمره فقط بحدود خمس سنين.. حجمه كبير وفي هدر للماي بحدود 15 بالاميه للماي الي تدخل فيه.. في فلاتر حديثه اقدرت تحل هالمشكله بس سعرها تضاعف  اكثر.. واخر عيب انه يشيل المعادن المهمه الي نحتاجها. 

الماي المقطر :

هي عمليه تبخير ثم تكثيف للماي بحيث يبقى ماي صافي خالي من كل شي. 

عليه جدل ان بعض المواد ممكن تتبخر مع الماي فلازم بآخر مرحله يمر بفلتر كربون.. وفيه جدل ان غلي الماي وشربها كل مره مو زين لصحتنا لان يتغير التركيب الكيميائي للماي يعني ادق صفه ماي ميت.. الفلتر غالي جدا ولازم كهربا.. وعلشان نطلع غالون نبي خمس ساعات . وخاليه من المعادن الاساسيه 

هل الحل نشرب مياه معبأه بالبلاستك؟ 

للاسف لأ فاغلبها مياه عاديه ومفلتره بالطريقه المعتاده واخر شي حاطينها بعلب بلاستك.. مع سوء التخزين ممكن هالمواد الخطره بالبلاستك تدخل الماي وخاصه اخطر ماده 

BPA

للاسف لأ فاغلبها مياه عاديه ومفلتره بالطريقه المعتاده واخر شي حاطينها بعلب بلاستك.. مع سوء التخزين ممكن هالمواد الخطره بالبلاستك تدخل الماي وخاصه اخطر ماده 

BPA

الفلاتر الي هابين فيها الحين انها تشيل الكلور والفلورايد وتزود قلوية الماء.. للاسف رحت وتكلمت مع اكثر من مصدر ولاشي مكتوب على هالفلاتر انها تشيل الفلورايد نهائيا.. ولكن فقط الناس الي يبيعونه حاطين هالكلام.. مامدى صحة كلامهم اذا الشركة المصنعه نفسها مو كاتبه؟! الفلتر فلتر كربون عادي وبعد التصفيه يمر باحجار ومعادن تزود قلوية الماء فقط. 

هذا هو.. فلتر بالتناضح العكسي 

Reverse osmosis 

بالضغط يدخل الماي بفلتر مايطلع الا جزيئات الماي.. وبعدين فلتر رواسب وبعدين فلترين كربون.. من غير هدر ماي نفس القديم. 

سعر الفلتر الواحد علشان نغيره كل ست شهور الى سنه بامية دولار .. غير الماكينة نفسها غاليه الي يمكن لها عمر افتراضي. 

كل شي ينباع على حدى. 

ولازم تنتبهون انها تزيل حتى الاملاح والمعادن الاساسيه الي نحتاجها بالماي ولازم تعويضها وهي الكالسيوم والصوديوم والمغنيسيوم والبوتاسيوم. 

في كارتلدج يرجع المعادن بس ابدا مو نفس الطبيعه.. فانتوا بايدكم تقررون هل سمية مياه منطقتكم عاليه وتستاهل هالفلتر او لأ.

وبالنسبة للفلتر اللي يشيل الفلورايد.. مافيه بالكتالوغ اي كلمة توحي انه يشيل الفلورايد .. الشي الوحيد انه يزود قلوية الماي.. لان بعد تصفيته بفلتر عادي كربوني يمر الماي بهالاحجار يمتص منها المعادن فتزود قلويته

.. وأما فلتر الاوزون.. ذكرت الشركة المصنعة على موقعهم بأنه بس يقتل البكتيريا والفايروسات والديدان والكائنات الدقيقه.. وبعض المعادن... ولكن اساس حوستنا اليوم من نيترات وفلورايد وغيرها للاسف مايشيلها. 

بلديات بعض الدول تستخدم الاوزون لقوته في قتل الجراثيم في محطات معالجة المياه ولكن ترجع وتحط كلور لان المسافه في بايبات الصرف الين توصل لبيوتنا طويله فممكن تتعرض المياه للجراثيم من جديد. 

الاوزون اول مايلامس الماي يشتغل بسرعه ويتفكك ويختفي خلال دقايق. 

بس معلومه وحده لقيتها تحذر من الاوزون ان ممكن يتحد مع مواد ويكون مواد ثانوية مسرطنه.. لا اعلم مدى صحة المعلومة ومارح اضيع وقت وابحث. 

لان ماحل مشكلتي بازالة المعادن السامه.

مدى صحة المعلومة ومارح اضيع وقت وابحث. 

لان ماحل مشكلتي بازالة المعادن السامه.

الماي بالفخار.. هل هو اصح طريقه لشرب الماء؟ 

بكل تأكيد فلا مقارنه بينه وبين الماي المعبأه بالبلاستك

لان البلاستك يرشح المواد الضاره في الماي الي فيه. 

ميزة الفخار هو بالمسامات الغير مرأيه تدخل الهوا او الاكسجين لداخل الماي.. تعطيه بروده وحياه. 

ولكن الفخار مو فلتر احنا نبي حل للماي قبل ماينصب داخل الفخاره. 

غلي الماء هو الحل؟ 

في الايام السابقه كان اكثر هم الانسان يتخلص من الجراثيم فكان يغلي الماي.. ولكن غلي الماء مايشيل المعادن الثقيله بل يرسبها.. ومثل الفلورايد يصير ملح فلورين اسوأ واثقل.

لاتصعبونها وهي سهله.. خلكم عالفحم اذا عندكم.. واذا معاكم بحبوحة روحوا لفلتر التناضح العكسي وزودوا غذاءكم بالمعادن وسلامتكم. 

جسم الانسان ماكينة فعاله لتنظيفها من السموم..وهنا تظهر اهمية الرياضه لطرد هالسموم طبيعيا.. واهمية عمل ديتوكس كل فتره.. وسبحان من كتب علينا الصيام كل سنه من كل شي حتى الماي ليطهرنا.. واحيوا سنة نبينا بصيام الاثنين والخميس وانتو بصحه وعافيه.. الموضوع تثقيفي بحت ووجب علي شرح الحقيقه كامله . 

معلومة سريعة

لكل الذين لا يحبون شرب الماء ويظنون أنهم لا يعانون من أي مشكلة 

النظره القاصره المحدوده هذه هي اللي خربت امم..يعني لازم الشي علشان اغيره يعطيني عرض فوري. أسئلة اسألوها نفسكم وفكروا فيها عدل.. شكثر ناس تعاني مشاكل هضميه عسر هضم.. انتفاخات.. قولون ؟ جفاف؟ اصابات وشد عضلي.. وامراض عديده اساسها السموم المتراكمه بالجسم الي اساسها ان الجسم مو قادر يصرفها.. طبعا الاسباب وايد بس اسرع سبب هو قلة استهلاك الماي. 

ناس تقعد بالايام ماتدش الحمام عزكم الله وماتتبول الا مره يلا مرتين باليوم. .. كل هذا يعني السموم المبرمجة عالخروج باستمرار من جسم الانسان قاعده ومتربعه.. تلهب الامعاء وتجرحها. او ترجع لمجرى الدم بعد مانطرحت..فتحقن هالغدد اللمفاويه الي تمر عليها.. وتقعد تحاول تطهر نفسها بالتعرق ماتلقى ماي تطلعه او تلقى مواد مانعه للتعرق وتنحبس وتحتقن أكثر.. كل هالشي مارح تحسون فيه نهائي.. ولكن متى تحسون؟ 

لمن كل شي يزيد عن حده وتظهر على شكل مرض او خلل. 

وبعدين نقول مافينا الا العافيه.. لان مانطالع لبعيد. 

عليا دوم تحبطينا ان كل شي صار سام وماندري شنسوي.

بكل بساطه هذي الحقيقه.. ولكن ربي خلق أجساد متكامله تشتغل صح لتخلص اجسامكم من السموم.. فلاتزودون هالسموم اكثر.. وين الديتوكس وين الصيام وين الإيمان بأنه لن يصيبنا إلا ما كتب الله لنا حتى لو وصل بنا العلم مداه. 

.................................................................