- عليا لحقيني بنتي عندها انيما.. ولدي معاه نقص فيتامين د مع انه كله يلعب بره.. ولدي او بنتي ضعيفه.. وجههم شاحب.. ولدي عنده زيادة وزن ومايتحرك نفس اخوانه هل عنده مشكله.
- المشكله مو بالطفل اكثر الحالات سبعين بالاميه الاهل هم السبب.
- تغذية خاطئة..عدم تشجيعهم عالحركة والنشاط.. عدم العناية بصحة الاسنان.. عدم الزيارة الدورية للطبيب.
- تبون عيال صحيين هذا هو الباكج الكامل لهم..وخل جسمهم يحارب بقوه اي عدوى خارجية ببناء مناعه قويه.. واي كسر ببناء عظام قوية.. وطبعا كل شي قدر ومكتوب ولكن نسعى بالاسباب.
- وحتى الاطفال المولودين بمشكلة صحيه هذيل العنايه فيهم تكون مضاعفه لتحبيط المرض وعدم تقويته.
- اول سؤال دائما الي اسأله شلون تغذيتهم؟
- فالرد يكون اما وايد او زينه او لأ ماياكل يتعب قلبي.
- الأطفال بهالعمر محتاجين تغذية متكامله مو سندويشه بخبز ابيض ومربى على بو عالاقل ياكل.
- ولا بسكوته المهم يحشي بطنه.. ولا جانك فود كمكافأه
- للاسف الشديد تربينا ان الطفل لازم يكون مربرب والا امه مهمله.
- فتضطر تدحش فيه اي شي.. رضاعه صناعيه مع حليبها حرام علشان يتغذى .. او طحين رز او سيريلاك مع الزبادي وشغلات وايد ولمن يكبرون سندويشه ورا سندويشه وكلها مكرره وحليب وحليب وحليب.. شبس وشبس وكاكاو وكاكاو وبيبسي وكولا وعصاير .
- معليه المهم ياكل
- اذا التغذيه من الاساس غلط.. استهلكت مخزون اجسادهم من الفيتامينات والمعادن فطلع عندنا جيل اما منفوش دهن.. او ممصوص دهن
- والاثنين خزان معادنهم منتهى.
- خزانات الجسم للمعادن تنضب مع السكر وشرحت شلون قبل وطبعا معاه الخبز والرز الابيض والطعام المكرر عموما .. والطعام العالي الحمضيه.
- اطفالكم لازم يتابعهم طبيب لان التشخيص يتم من خلاله.. انا اساعد في ايجاد حلول غذائيه.. او بعض الاخيان البحث عن مسببات المرض الي الدكتور للاسف مايبحث عنه ويكتفي فقط بالعلاج بالمواد الكيماويه.
- الدنيا سهله.. اساس البيت الأم الأم الأم ثم الأب.. حتى لو خربطوا الاولاد مع جمعة الاهل يوم.. انتي الي ماسكة زمام الامور باقي الاسبوع.
- الجسد ربي خلقه فابدع صنعه.. متكامل ينظف ويعدل ويوازن انتي عليج بس تحطين البنزين الصحيح اكثر الوقت.
- وربي يحفظ عيالكم وعيالنا وعيال أمة محمد.
- معلومة سريعة:
- البستره والهرمونات والمضادات الحيويه.. البستره السبب الاول للحساسيه عند الاطفال.. تقتل الانزيم الهاضم لللاكتوز ويسبب نفخه والم بالقولون وتخمر للسكر بالبطن وزيادة للبكتيريا الضاره.. والهرمونات والمضادات معناها التهابات زياده وأمراض ورد فعل عكسي لنا والشرح يطول
ونجي لنقطة ثانية
العيال الي مطلعين عين امهم في الاكل لابد يطلع فرقع لوز بالعيال ويكون هالنوع.. وانا عندي واحد.. مايحب الاكل يبي يلعب ببي يبدع ربي يحفظه من وهو نتفه احط الاكل يسوي رسمه او سفينه او وحش عاد انا وحظي.. انزين ماما شرايك ناكل الوحش .. لأ مايصير
هالايام ماقام يتخيل الاكل شغلات بس للحين يقعد خمس دقايق ومع السلامه.. فالحل كان كالتالي :
Finger food اي شي اصابع او قطع صغيره نفس الناغتس
وهالشي يشمل الخضره الفواكه.. فلافل العدس.. او اقراص الدجاج او اللحمه.. بطاطس وبطاطا حلوه وهيكما والباتر نات سكواش
وطبعا الورق عنب والملفوف والكوسا الصغيره.
Soups اروع واسهل شي احط كل شي بالشوربه واهرسها واحطها بالكوب الي يحبه.. وللحين نافعه
Smoothies حق كل شي ني من خضار وفواكه ومكسرات وافوكادو ودهون صحيه.
يعشق العيش اي نوع رز ابيض/اسمر/اسود/كينوا/برغل.. كله يسميهم رز
مايحب السلطه الورقيه فلذلك احطهم بالسموثي
ولو الاكله متعبه لازم اخلص اكلي واقعد معاه شوي نلون او نرسم واقدر اقص عليه بجم لقمه بحلجه.
ابدعوا ترا محد يفهم عيالكم غيركم?
ليست هناك تعليقات:
إرسال تعليق