مبادئ التغذية السليمه في الطب البديل - ضعف حمض المعدة- (موضوع كامل)

• المعدة بيت الداء.. كل جهاز في جسم الإنسان مهم جدا وماقدر اقول عن احد اهم من الثاني لان الكل مربوط ببعض ويشتغل بتناغم وابداع علشان نعيش دوما بتوازن كامل. 

  لكن المعده بالذات لانها ثاني قسم يستقبل الاكل بعد الفم فهي مهمه جدا جدا كوظيفة استقبال للطعام بمايحتويه من سموم وبكتيريا وحتى كتل كبيره غير ممضوغه من الطعام.. لان الطفس الي ربي خلقله اسنان الي مفروض يمصغ اكله علشان يخفف شوي عن المعده بلع الاكل نفس ماهو وجنه معدته مزبله 😠😠😠.. وهي المسكينه بعضلتها القوية وعصاراتها الحمضية تسوي كل شي بروحها. 

  بتكلم اليوم عن حمض الهيدوكلورك الي لو ضعف او قل تبهدلنا آخر بهدله. 

  Underactive stomach 

  وهي المعده الضعيفه الغير قادرة على افراز انزيمات هاضمه وافراز حمض الهيدركلورك لاتمام عملية الهضم السليمه. 

  اسبابها :

  عند تناول كمية كبيرة من اللحوم الحيوانية خاااااصه الحمراء.. الالبان.. الاكل المكرر والمعالج.. الاكل السريع القمامي.. وفي بعض العادات السيئة انكم تشربون ماي مع الاكل او مياه باردة جدا مع الاكل.. الدمج الخاطئ للاكل (وهذا بشرحه بروحه) والسترس والحاله النفسيه كلها تأثر بانتاج المعده للحمض وكثرة استخدام مضادات الحموضه تثبط انتاج حمض المعده. 

  وبهالزمن ترا الاطفال والشباب صار عندهم ضعف معده اكثر من الكبار. 

  طيب عليا لو عندنا هالحاله شراح يصير؟ 

  طبعا راح ياثر على الهضم وبالتالي ياثر عالقولون ويسوي امساك.. ضعف في امتصاص المعادن والفيتامينات في الاكل نفس الكالسيوم والمغنيسيوم والكروميوم واليود والحديد والمنغنيز والبوتاسيوم والسيلينيوم والزنك.. ولكن بالذات بالذات الكالسيوم والحديد والزنك يحتاج لحمض معده قوي. 

  وطبعا الديدان تدخل الجسم بكل سهوله مافي شي يمنعها.. والبكتيريا نفس جرثومة المعده تقعد وتتربع في المعده.. والحساسية 😢😢

اول مبدأ اساسي في التغذية السليمه في الطب البديل وهي مزج الغذاء بطريقة صحيحة.. ادري انها صعبه على وايد ناس وانا اولهم عانيت الين صارت سهله وايد علي ولكن اكسرها ببعض الاوقات اذا بخاطري كينوا او رز ودجاج 😂. لكن الي صج منعته نهائيا الفواكه ما اكلها مع ولاشي الا خضره وكانت بالفعل اقوى خطوه خففت الانتفاخات. 

هالمبدأ مرفوض نهائيا علميا بحجة ان المعده تقدر تستوعب كل شي وتسوي وظيفتها باكمل وجه ماتفرق بين خضره ولحمه او فاكهه. 

لكن لو ركزتوا فيها مبدأ هالعملية هو ابعاد اي تخمر عن البطن وعدم تأخير عملية الهضم وخاصه داخل المعده. 

فالفواكه خاصه ثم النشويات ماتطلب وقت وايد لهضمها نفس البروتينات. 

ولو تخيلنا المعده بالونه فيها فتحتين الاولى يدخل منها الاكل والثانية يطلع منها الاكل... فنتخيل كلينا خضره بعدين دياي ورز ابيض بالترتيب.. راح تبدا المعده بافراز حمض المعده. 

الخضره الغير نشوية تنهضم بكل سهوله ولكن راح تستهلك من حمض المعده.. راح يدخل البروتين بكمية اقل من الحمض وتحاول المعده تكمل مهمتها بكفاءه ولكن مو بايدها هضم البروتينات ياخذ وقت وتذكروا ان فتحة المعده ما تمرر الاكل كله مره وحده لازم تتطمن ان كل شي انهضم وانخلط صح وتفرغ الاكل نتفه نتفه فيكون النشويات انهضمت هضم بسيط وبدت بالتخمر فتأخر تصريفها يسوي الانتفاخ.. يعني راح يأخر التصريف ويخلي الهضم اقل كفاءه.

كل دكاترة الباطنية والجهاز الهضمي يرفضون هالمبدأ وانا اطلب تجربونها وتشوفون الفرق.. اصلا من كثر مانقط بهالمعده صارت مزبله ماعدنا نحس بشي.. صار عندنا لاوعي وعدم احساس بالمعده المسكينة. 

..

ادري شدكم العنوان هههههه.. انا حامل.. هو تعبير الشخص لانتفاخه الشديد بعد وجبة الاكل.. والاسباب كالتالي :

ياكل بسرعه من غير مضغ فيرهق المعده بوقت اطول للهضم.. وبالتالي تخمر الاكل والانتفاخ.. ومو بس جذي المضغ ببطئ يجهز المعده ويحثها لافراز حمضها.. فاذا كلينا بسرعه وهي للحين ماجهزت روحها وخاصه صباحا راح يرهقها .

فاللي يقول كل اكل ملوك الصبح واتعشى عشا الفقرا مع احترامي للي اخترعها غبي.. بكل بساطه اذا خلصتوا حمض معدتكم من الصباح شبقى لباقي اليوم.. الاعتدال لازم يكون بكل الوجبات والمضغ الجيد عالاقل عشرين مره قبل البلع. 

غير ان الاكل بسرعه يدخل الهوا ويسبب انتفاخ ايضا. 

ضعف حمض المعده الي يعاني منه 99.9 بالاميه من البشر. 

اكل كميات اكل كبيره فوق طاقة الجسم في هضمها مثلا الاستهلاك الكبير للحوم والبروتينات كلها محفزات حمض المعده فالافراز المستمر يرهق المعده الى درجة ان ممكن توقف كليا.

في شي بعد دوم اشرحة لحالاتي عن قسم بالدماغ اسمه

Parasympathetic nervous system 

هذا المسؤول عن البناء والهضم 

وقسم ثاني اسمه

Sympathetic nervous system 

هذا مختص بالهدم وحماية الانسان في وقت الخطر 

Fight and flight response 

فلازم الجسم يكون سلس يتحول من هذا لهذا بسهوله ولكن للاسف الشديد احيانا يتحكم قسم تماما ويتمرد على جسم الانسان وهذي يدخل فيها عدة عوامل ولكن اكتشفت من تحاليل الشعر لحالاتي ان السترس الشديد وخاصه الي يكون من حساسية خفيه ترهق اجسادهم وهم مايدرون الى تحكم الباراسمبثاوي علشان يحافظ عليهم من عملية الهدم المستمره فيطفي دقمة الجسم .. فيأثر عالهضم علشان حفظ الطاقه ويأثر على كل شي حتى على الفتحه الي بين المريء والمعده فممكن يحصل ارتجاع مستمر (موبكل الحالات) يحس الجسم بالارهاق الشديد وهبوط ودايما مرتبط بارهاق الغدة الكظرية كذلك.. ادري معقده شوي بس حبيت ابينها لكل مهتم. 

السترس يأثر على إنتاج الحمض بكل تاكيد. 

ضعف الغدد ككل وخاصه الغده الدرقيه.

شلون نعرف عندنا ضعف بحمض المعده؟ 

ماهي اعراض ضعف حمض المعده؟ 

نفخه / تجشؤ / حرقه فورا بعد الاكل

الشعور بالتخمه حتى لو كلينا شوي

وجود اكل غير مهضوم بالبراز.. مع امساك او احيانا اسهال بس اقل. 

الاحساس ان الاكل قاعد على معدتنا (بالعاميه). حساسيات متعدده. 

اظافر ضعيفه وتتكسر بسرعه

شعيرات دموية على الانف والخدود لان الكبد يصير مرهق ويصير ضعف في المواد الغذائية. 

ممكن بفحص البراز يتواجد بالتحليل بروتين (هذا بالحالات المتقدمه) 

الشعور بالدوخه او القيأ مع المكملات. 

حبوب الشباب عالوجه. 

انيميا 

ضعف بالحديد او باقي المعادن لذلك انتو ماتحتاجون معادن كمكمل تحتاحون تقوية هضمكم علشان كل شي يتعدل والدليل ناس تاخذ مكملات لشهور ولازالت المعادن ناقصه... لذلك صحيح اطلب من حالاتي وانصحهم بتحليل الشعر لكن الحل بتقوية الهضم والمعده وليس فقط اعطاءهم مكملات واكل.

حكه بسبب الديدان لان جهاز الحماية الاول حمض المعده ضعيف فتدخل بسهوله. 

بكتيريا كانديدا وجرثومة المعده والي ايضا تحتاج لحمض معده قوي علشان يذبحها. 

الحل؟

قبل لا اكتب الحل لازم ولابد تستوعبون ان الشي الي اتبهدل بسنين مارح يتصلح بيوم وليله وعالاقل شهر او اكثر من الالتزام الصارم علشان تشوفون نتايج مبهره. 
اول نصيحه بطيت عين حالاتي فيها.. توقيف القهوه والشاي والمشروبات الغازية 😂😂
تخفيف البروتينات الحيوانية وممكن توقيفها تماما للحالات المتقدمه ومنتجات الألبان كلها. 
شرب ملعقة خل تفاح او ليمون قبل الوجبه.. او شربها مخففه قبل بعشر دقايق من الوجبه لتحفيز حمض المعده...او اكل اي شي مر.. زيتونه.. حتى لو ستين مل من عصير الالوفيرا عجيب حتى للي عنده تقرحات رائع. 
الابتعاد عن السكر نهائيا وكل الاكل المكرر الي يستهلك المعده وياخذ مخزونكم من المعادن والفيتامينات المهم للجسم علشان يفرز حمض. 
التحضير الصحيح للطعام بالتخمير والاستنبات وخاصه للبقول والحبوب والبذور. 
شرب كمية راهيه من الماء خلال اليوم وليس مع الوجبه نهائيا. 
اكل وجبات صغيره فيها بروتين كامل حيواني او نباتي مع زيادة الخضره المره معاها. 
الالتزام بالجمع الصحيح للوجبات. 
واذا الوجبه كانت متوازنه بروتين حيواني وخضار.. تاكلون البروتين اول قبل الخضره.. نعم عكست نصيحة كل الاخصائيين بس جربوا وادعولي.. اهم شي تتحكمون بالكمية. 
امضغوا الاكل ببطئ تهنوا فيه اكلوه كأنكم ماراح تاكلونه بحياتكم عقب هالمره 😂❤. دايما شيكوا عالغده الدرقيه وحافظوا على توازنها طبيعيا. 
لازم تاكلون وانتو مرتاحين.. والأفضل مايكون في تلفزيون او اي شي يأثر عليكم.. وتذكروا ان الدماغ لازم يكون شغال عالبراسمبثاوي ساعة الهضم. 
اخذوا ثلاث انفس عميقه قبل الاكل.. فكروا بالاكل.. طالعوه.. كل هذا يحث المعده على إنتاج الحمض. 
اشربوا باليوم كوب او كوبين خضره طازجه تدعم الجسم بالانزيمات. 
ممكن تاخذون انزيمات نباتيه هاضمه مع الوجبات. 
اما مكمل حمض المعده ماشجع عليه وايد لأنه راح يكسل المعده على افرازه لكن اذا الحاله اكبر من خمسة واربعين سنه او حمض المعده كلش موقف.. لا لازم حمض معده من مصدر طبيعي
Betaine HCl 
في ناس عندها رد فعل عكسي منه نفسي 😂.. بس للحين محد غيري بالكره الارضيه. 
البروبايوتك شي مهم واساسي وممكن استهلاك ساوركراوت مع الوجبات رائعه. 
الزنك اساسي لانتاج حمض المعده ويبين بتحليل الشعر لو الجسم صج محتاجة كمكمل.. بس مجرد اتباع كل الي فوق ☝ راح يتحسن امتصاص الزنك من الطعام وبالتالي وظيفة الجسم تتحسن ككل. 
ولاتنسون تلعبون رياضه وتتحركون وايد وتبعدون عن المطبخ وعن قنوات الطبخ 😅😅 تابع وصفات طبيعيه عشبيه لتحسين الهضم...