أسنان الأطفال
القصه ابتدت من لما كانت بنتي عمرها ثلاث سنين وشوي..كنت ام عاديه تحب عيالها واروح دكاترة الاسنان يشيكون على اسنان اولادي بانتظام.
ولاحظت بنتي ناردين عندها تسوس بسيط في ضرسين. فدكتور اطفال قال لي لازم احفر واحط حشو علشان السوسه لاتروح العصب.. اوكي وبس خلص حط كراونز على الاسنان لحمايتهم.. المهم خلصت مع هالدكتور عقب سنين بست اسنان عليهم كراونز.
وعقب فتره لاحظت بنتي قاعده تتراجع بالذكاء مو قادره تحفظ.. اكرر اكرر ماكو فايده.. لا قرآن ولا عربي ولا بالكتابه بالانجليزي والماث مع العلم لمن كانت بالروضة كانت تحفظ لمن اكرر بالكثير مرتين.
فموقادره اصدق هذي بنتي.. في شي غلط.
وساعتها كنت توني باديه دراستي كمعالجة غذائيه شامله.. وقريت عن الزئبق واضراره.
فقلت ياربي تماما الاعراض فيها.. هالدكتور شنو حاط باسنان بنتي.. ركدت على دكتور ثاني.. اقوله سويلي اشعه شوفلي شنو تحت الكراونز قالي اقدر اشوف.. وبالفعل كانت اسنانها كلها محشيه زئبق امالغام.
استعجب وقال لي شلون يحط لطفله انا ماستخدمة ابدا ومن هالكلام الفلسفي.
وقال لي اذا تبين اشيلهم انا مستعد.. ولكن قال لي لان اسنان بنتج صغيره لازم نحميهم بكراونز مره ثانيه ولاتحاتين الستينلس ستيل كراونز آمنه تماما.
وثقت فيه وشال كل الزئبق من ست اسنان بأمان ورجع الكراونز.
ما اجذب عليكم تحسنت حيل وارتفع مستواها.. ومعلمتها حيل مستانسه منها ومن خطها وقدراتها بالرياضيات.
وبيوم قلت ابي اسوي تحليل دم شامل لها لان مو عاجبني انها اسرع وحده تمرض بالبيت.. ودوم يطلع لها حبوب بالحلج مسامير بالريول.. ومحد فينا نفسها.
فحصت دمها لانصدم بشي ثاني ماخطر على بالي.
في كسل بسيط بالغده.
منو؟ بنتي انا ... اعوذ بالله يومها ماعرف شلون اوصفلكم شعوري.. قلبي انفطر
ورجعت وبديت حربي ضد دكاترة الاسنان.
ورحت لنفس الدكتور اقوله شيلهم ما ابيهم رفض لان صار حافرهم.. يا اشيل كل السن يا اصبر.. بجيت ومشيت ودعيت ربي يحرق قلب كل جاهل قدامه الحق وينكر.
طبعا دكتورتي قالتلي عليا سوي الي تبينه لاتخافين مابوصف شي انتي ماتبينه واهم شي خبريني بالتفاصيل الي راح تطلع معاج.
فورا ركدت سويت تحليل شعر وبول.
ونتيجة سموم البول قدامكم...علشان تستوعبون اكثر.. حشوة الامالغام تحتوي على التالي:
Mercury /silver / tin / copper /lead
الكراونز
Titanium / nickel
عقب سنة من ازالتهم.. ابيكم تتخيلون تخزن شكثر بغدتها ودماغها الي للحين قاعد ينقط بهالكميات المهوله.
انا اليوم سعيده مو حزينه اللهم لك الحمد حمدا كثيرا لاني عرفت السبب..وجاري العلاج.. اللهم انت الشافي لا شفاء الا شفاؤك شفاء لايغادر سقما
.....
ليست هناك تعليقات:
إرسال تعليق