إدمان السكر
عليا لحقيني ؟! شنو شالسالفه؟! انا تعبانه حيل.. مو قادره اوقف اكل حلويات ووزني كل ماله يزيد شالحل؟!
اعتقد عندج ادمان عزيزتي
لا عادي مو ادمان بس احس اني ابي اكل اكثر
عزيزتي انتي مدمنة سكر ولازم تتعالجين
خلاص يعني اربط المعده هذا الحل؟
لأ لأن اسهل شي وانتي رابطه تاكلين حلويات صغيره وعصاير وكولا...
انتي تبين علاج ادمان
ردت تقول ادمان..
خلاص مشكوره عبالي عندج حل..
اكثر المواضيع الي اصادفها بالاسئلة هي مشكلة السكر والحلويات والادمان عليها.. تعالوا اسألكم وجاوبوني
هل لما تاكلون سكر تحسون براحه نفسيه وتحسن مؤقت بالمزاج؟
هل لمن تاكلون حبه حلويات تحسون ودكم ماحد يشارككم فيه علشان لايخلصه؟
هل لمن تاكلون حلو ما تقدرون توقفون؟
هل تدرون ان عقب ماتخلصون علبة الحلويات او الكولا بيعوركم بطنكم بس عادي بتخلصونه لان تحبونه؟
هل اذا كليتو قطعة الحلو وخشيتوا قطعه تقعدون تفكرون متى تاكلون هالقطعه الثانيه؟
هل صار لكم مضاعفات من السكر سمنه او مرض سكري اوصداع وغيره ومع هذا ما وقفتوا سكر؟
اذا كانت اكثر اجاباتكم نعم.. فنعم ياقارئ الموضوع انت مدمن او متجه للادمان.
السكر شي اساسي بحياتنا ولكن خل نفهم السالفه اكثر.. خل ناخذ سكر القصب كمثال
سكر القصب الغير مكرر فيه فيتامينات نفس فيتامينات باء واثار لمعادن نفس الكروميوم.. والي عنده فكره وسمع بهالاسم.. الكروميوم هو المعدن الاول لمعادلة السكر بالدم صحيح بكمية قليله لكن موجود.. وعلشان هالسكر ينهضم يبي معادلات كيميائية بالجسم تستلزم نسبه معينة من الفيتامينات والمعادن لاتمامها
انزين لما ناكل سكر ابيض مكرر مصفى مافيه ولا شي فلما الجسم يهضمه يقوله عمو وين فيتاميناتك يقوله ماعندي انا فقير تقدر تسلفني من عندك.. للاسف الجسم طيب حيل ويعطيه الموجود في المخزون.. مره على مره على مره الخزان يخلص.. فالجسم يغير طريقته في التعامل معاه وللاسف يبدأ يدز إشارات للدماغ خاطئة لان الجسم صار غير متعادل.. والنتيجة الادمان.. وهالشي مو بس مع السكر بل مع كل ماده مالها اي فايده غذائية فقط ارهاق الجسم اكثر واكثر.
اعتقد لو فهمتوا جسمكم شلون يتعامل مع كل شي داخل فيه بترحمونه شوي وتحسنون مكافأته بالاغذية الغنية بالمعادن والفيتامينات لانها بالاخر صحتكم.
.....................................................................
وكعادتي ما احب الشرح والتفصيل الممل بعطيكم اطراف الحلول وعليكم الباقي
اولا النية الفعلية بالتغيير
لاتضيعون وقتكم ووقت غيركم وانتو من الداخل مو ناويين التغيير
جملة تعودت اشرب الشاي بمكعبين سكر او قفشتين.. تعودت اخلص اكل بعدين احلي.. تعودت اروح كل جمعه اكل كنافه.. كلمة تعودت جابتنا ورا.. كسري كل الحواجز.. ادري ان العاطفه تلعب دور كبير بعلاقاتنا الاجتماعية لكن لابد ان نقف ونحط نقطة ونبدأ حياة جديده فيها ذكريات اجمل.
ثانيا منع كل المغريات من البيت
واولها حلويات اطفالكم لانها مثل ماذكرت تستهلك كل مخزونهم من المعادن والفيتامينات تخيلوا طفل لازم يكبر وعنده نواقص بجسمه شراح يصير بجسمه اللين؟ غير انه ببكون عرضه سهله للامراض
ثالثا ايجاد البديل
لان مثل ماقلتلكم الحلا مهم بحياتنا ولكن عليكم بحسن الاختيار.. عسل / تمر / فواكه طازجة وجافه / سكر غير مكرر.. مع التحكم بالمقدار
رابعا تعويض الجسم بالمعادن والفيتامينات
اول ما تعوضون جسمكم الخلل الي صار فيه بيتعدل بروحه وبيخف طلبه للماده الادمانيه الي شفطت عافيته.
وهذا يعني نظام صحي متكامل خالي من المواد المكرره والمعالجة كله الياف صحية مشبعه فيه كل المكونات من بروتين وكربوهدرات ودهون.. مو شي على حساب شي.
خامسا معادلة الفلورا
ببعض الاحيان لمن نظامكم يكون عالي بالكربوهدرات وخاصه المكرره من سكر ورز وطحين ابيض ومنتجاتهم تغذون بكتيريا ضارة موجوده بكل بني ادم اسمها بكتيريا الكانديدا هذي اذا زادت عن حدها فابشروا بعشق وادمان السكر.
سادسا معادلة السكر بالدم
وهذا راح يتم اذا طبقتوا الخطوة الرابعه فوق.. اهم شي مايصير
Sugar spike
وتتبهدلون مو بس بتخزين الدهون بل والجوع والحث على ادمان السكر.
سابعا العلاج النفسي
اقعدوا مع نفسكم واسألوا أنفسكم شتبون بالضبط ليش ناكل شي وندري هالشي يضرنا؟ اكيد تعبانين نفسيا او ملل او سعادة قصوى يعني عدم تحكم بالاراده او ضعف روحي يؤدي للجوءكم لحلول مؤقته اعتقد هالنقطه معقده شوي وتبي شرح مفصل بس هذي عليكم
يلا تحكموا باجسامكم واذا اشتهيتوا شي كل فتره مافي اي مشكله ابنوا اجسام صحيحه قوية ما تأثر فيها وجبه خربوطيه كل فترة.
ليست هناك تعليقات:
إرسال تعليق