وصفة الديك الرومي
الديك الرومي.. منو مايحبه ??
عيبه ان حجمه كبير حتى اليونغ اصغر شي لازال كبير ???? والصدر الواحد يغذي عايله كامله.. وبتطلع عينكم باللفت اوفر وبتفرزون الباقي.
طبعا تعرفون ان هني موسم اعياد المسيحين ويحبون تقديم طبق التيركي على السفره.. فهذا الوقت الوحيد الي ممكن اللحام المسلم يوفر لنا فيه تيركي مذبوح على الطريقة الاسلاميه.
مادري شكله في ناس وايد تحب تقلد ????.. ماعلينا انا مالي شغل ????
اخر مره كليت تيركي من صنع ايدي كان من سنين.
واخر شي احبه ان ميزة التيركي مايبي الا زبده وملح وفلفل وعالفرن.
هالمره غيرت الخطه وسويت تتبيله من اعشابي وبهاراتي وخضاري المجففه.
بهارات خضار نفس ارض الطبيعه بس من صنع ايدي.
بابريكا من صنع ايدي.
ملح وفلفل وليمون وزبده واعشاب طازجة وثوم طازج.
مسحت الديك من داخل من فوق وبين الجلد.. ممكن تخلونه فتره بالخلطه بس مو لازم دام الديك فرش وصغير.
حشيته خضار مقطعه صغير من بطاطس وكوسا وبصل وباثنجان وفلفل بارد ملون وبصل اخضر وتبلتهم بزيت زيتون وملح وفلفل وبهاراتي واعشاب طازجة وخاصه الروزميري.
وتحطونه بالفرن على حراره متوسطه.. لكل كيلو ساعه.. ولأدق نتيجة عقب ساعتين الى ثلاث ساعات حطوا الترمومتر الحراري بصدر الديك من غير لاتلمسون العظم لازم يكون بحدود
165 F
النتيجة النهائية
كالعاده حمرته زياده عن اللزوم.. ويارب المره القادمه اتذكر اني اغطيه بنص فترة الطبخ.. بس لاتحاتون جلد التيركي سميك حتى لو طلعت سودا ماينشف اللحم تحتها..نشفان اللحم يعتمد على مدة طبخه.
الطعم رائع ترف والبهارات مسويه شغل حلو.. لاتحاتون من تجربة شي جديد فالحياه تجارب وعلينا وعليكم بالعافيه
...
ليست هناك تعليقات:
إرسال تعليق