الكربوهيدرات
تعمدت احطلكم هالصوره مو صورة خبز ?? .. للاسف الشديد الناس انحفر بمخها ان الكربوهدرات هو فقط الخبز والحبوب واخوانها ونسوا ان الكربوهدرات مقسمه لاكثر من قسم.
الكربوهدرات هي المكون الثاني الأساسي باجسادنا ولايلغي اهمية اي مكون ثاني نهائيا ولكن نبي نرتب الاولويات.
بكل بساطه لما يتحد الكربون مع الهيدروجين والاكسجين بنسبه معينه ينتج كربوهدرات من الاسم كربون وماي.
اساس واسرع طاقه ممكن ناخذها هي من الكربوهدرات.. ولايروح تفكيركم للرياضه فقط ولكن الوظائف الحيويه للجسم كله تحتاج طاقه.
معلومة صغيره: حتى اللحوم فيها نسبة كربوهدرات لان لهم القدرة نفس الإنسان بتخزين الكربوهدرات من اكلهم بالعضلات.. ولكن نركز اليوم على المصدر المباشر فقط من النباتات.
تقسم الكربوهدرات علميا على حسب تركيبها.. هل السكريات الي فيها احاديه ولا ثنائيه ولا اكثر تعقيدا وطبعا ماننسى الالياف الي ماتنهضم.
وفي قسم صغير وهو كحول السكر مارح اتعمق فيه ولكن هو ايضا كربوهدرات.
خل ناخذ امثله :
كربوهدرات بسيطه
Simple carb
هي سكريات بسيطه احاديه وثنائيه سريعة الامتصاص
احادية مونوسكاريدز : غلوكوز /فركتوز/غلاكتوز
ثنائية ديسكاريدز :لاكتوز/سكروز/مالتوز
للاسف التحضر استغل العلم والتقنيات الحديثه وسحب هالسكريات السريعه من النباتات.. فوين الخلل اذا اهيا طبيعيه ومن النبات؟.. الخلل ان هالسكريات علشان تنهضم تكون في نبات فيه الانزيم الخاص لهضمه بوجود الفيتامينات والمعادن الاساسيه لانجاز هالمهمه من غير اي مشاكل.. فإذا سحبناه بروحه راح نسوي خلل بالجسم بكل مره نستهلكه وخاصه بالكميات الكبيره.
الكربوهدرات الصعبه:
Complex carb
البوليسكاريدز فيها اكثر من نوع سكر طبيعي نفس النشويات.. الحبوب والبقول والفواكه والخضار.
الالياف :
Fiber
هي السكريات الصعبه الي ماتنهضم وتعطي النبته شكلها وقوامها الصلب وتنقسم نوعين تذوب بالماي ونوع مايذوب بالماي
كل النباتات فيها خليط من هالالياف.. مثلا السليولوز واللِغنِن ماتذوب بالماي ولكن البكتين والصمغ والسائل الهلامي يذوب بالماي.
الالياف جدا مهمه وراح نقول أهميتها..
..
ليش هالهبه الكبيره حوالين الالياف؟
ليش الكل ينصح بالالياف عورتوا راسنا ??
لمن انتهج الانسان النظام الحديث في التغذيه.. التعبير الاصح النظام الخربوطي.. الشبه خالي من الألياف.. الي نسميه
Refined American Standard diet
لقوا امراض زادت حيل وحصروها ب : الامساك.. مشاكل هضميه.. داء الرتوج .. سرطان القولون.
طبعا نظرهم ضيق.. لكن بالفعل هالامراض زادت ومع الدراسات وزيادة الالياف خفت.
زين شنو فايدة الالياف؟
الالياف مثل ماقتلكم هي الجزء الغير قابل للهضم.. فتكون الجزء الاكبر من الفضلات وتسرع خروجها..وبالتالي تمنح راحه للجسم يعني من غير تعني.. وهالشي مفيد جدا وللوقايه من البواسير لانها تلهب وتحتقن خاصه عند الاشخاص الي حركة خروجهم تتأخر وصلبه خاليه من الالياف والماي.
وجود الالياف يؤخر هضم الكربوهدرات وبالتالي يقلل من سرعة امتصاص السكر بالدم.. ويعطي شعور بالشبع لفترات طويله.. وهالشي حيل مهم لمن نعالج شخص يبي يتحكم بوزنه وشهيته .. زيادة الالياف يعني تحكم اقوى بسكر الدم..ولانها تتحكم بالسكر راح تقلل من حدوث حصوات المراره والكلى.
لها قدره عاليه بسحب السموم من الجسم وخاصه الي تتكون بالامعاء من الكائنات الحيه الي فيه والتخلص منها بسهوله.. يعني بشره اصفى وانقى وكلها حيويه.
تقلل من امراض القلب والجلطات شلون.. لان بكل سهوله تحسن من الوظيفه الهضميه والتخلص من السموم والي منها الكولسترول الضار الي يلزق عالاورده المجروحه وبنشرحه قريب بالتفصيل.
منظمة الغذاء تقول لازم تاكلون
20_30 gram
والناس يالله تحصل
10_ 15 gram
في حين الشعوب الصحيه الي ماتاكل اكر مكرر او عالي بالفات والبروتين لقوا انهم ياخذون
75_ 100 grams
يعني شكثر ناكل؟
ناكل خضره وفواكه بكمية كبيره.. وحبوب وبقول وبذور كامله.
مانقدر نحصل هالكمية.. هل ناخذ بودره؟ ?? اي شي... دوم تبون الحل الاسهل ادري فيكم.. حبه بودره شي سريع.. مالنا خلق ??
طبعا في اشخاص فطاحل بالتغذيه ينصحون بشرب البران قشرة الحبوب خنقول
Oat bran / wheat bran / rice bran
انا ضد هالفكره نهائيا.. واحد لان ربي خلق البذره كامله ناكلها كما هي.. لا آخذ الحبه مكرره ولا اخذ قشرتها بروحها.. اعتقد الي اخترع هالشي هو شخص عنده مصنع حبوب فيقشرها وببيعها مقشوره.. وقال يلا دام الدراسات قالت الفايبر ممتاز خل نبيعلهم القشور بدال مانرميها ??????
ثانيا : قعدت السنه الي طافت اشهر بشرح طريقة تجهيز الحبوب بالاستنبات والتخمير الطبيعي للتخلص من السموم الطبيعيه وتكسير الفايتك اسيد الي يساعدنا في امتصاص الفوايد الغذائيه بالقشره.
..
برأيي القشور او البران.. هي اسوأ مصدر للالياف.. ممكن تلهب الامعاء وتزعجها.. وممكن تسبب حساسية عالاستخدام المستمر.. بالاضافه للفايتك اسيد الي راح يأثر على العصارة الهضميه ويأثر على امتصاص الفوايد الغذائية الي فيه.
يعني لمن احد يقولكم ترا في كذا غرام مغنيسيوم ومادري جم كالسيوم.. قولوله عمو تدري ان فيه فايتك اسيد؟ ????
تمام الحين اعطيتكم المعلومه مابي احد يسأل يعني زين ولا مو زين... كل له راسه يعرف خلاصه ???? اخر نوع فايبر هو الالياف المذابه بالماء البريبايوتك:
هذي هي غذاء البكتيريا النافعه بالامعاء تقدر تستخدمها وتخمرها وهي أساس تقوية مناعة اجسادنا.
امثله :
الياف ماتذوب بالماي insoluble fibers
الحبوب الكامله والذره والمكسرات والبذور وقشور الفواكه نفس التفاح/ الموز/ الافوكادو.. الخضار الخضرا.. الكوسا.. الزهره.. الكرفس وغيرها.. والطماطم والكيوي.
الالياف الي تذوب بالماي
Soluble fiber البقول والشوفان والجاودار والشعير والفراوله والتوت والخوخ والتفاح والموز والاجاص والبروكلي.. عشبة الاسباغول.
وكل شي يذوب يغذي البكتيريا
والنوع الاخير البريبايوتك :
Prebiotic soluble fiber لقوا من فتره مو طويله نوعين فايبر اسمهم
Inulin / fructan
اقوي شي بتغذية البكتيريا الي تقوي المناعه
ولقوهم بالذت في البطاطا الحلوه.. والخضار الجذرية.. نفس ارضي شوكي القدس.. الهليون.. الثوم.. البصل.. الموز.. الهندباء.
مو كل الناس تقدر تستهلك هالقائمه بفعاليه.
وعموما لمن ناكل لازم يكون محتوى غذاءنا منوع بكل الانواع مو شي على حساب شي.
تذكروا ان اغلب الخضار والفواكه فيهم النوعين.. فكثروا خضاركم
ليست هناك تعليقات:
إرسال تعليق