الدهون غير المشبعة
بعد ماخلصنا الدهون المشبعه ضل عندنا الدهون الغير مشبعه وتنقيم قسمين :
احادية
Monounsaturated Fat
نفس زيت الزيتون.
ومتعددة
Polyunsaturated Fat
والصراحه بطنش الاحاديه وبركز على المتعددة مو لسبب ولكن لعرض بعض المعلومات المهمه جدا.
تنقسم الدهون الغير مشبعه المتعدده لثلاث اقسام
Polyunsaturated omega3
Polyunsaturated omega6
Polyunsaturated omega9
شنو هالزيوت وشنو اهميتها ووين نحصلها وشكثر ناخذ منها وهل اذا ارتفع احد عن الثاني يضرنا؟
يلا هذي رحلتنا الاستكشافية الجديده ?? وبنركز على الاوميغا ثلاثه وسته.
خنشوف اول شنو اقسامهم
Omega3 :
alpha-linolenic acid :
نحصلها في بذور الكتان / بذور القرع / بذور الهمب / والجوز
Eicosapentaenoic acid (EPA)
زيت السمك
Docosahexaenoic acid (DHA)
زيت السمك
اما
Omega6
Linoleic acid :
زيت العصفر /زيت عباد الشمس / السمسم / وزيت بذرة العنب/ زيت الصويا / زيت القطن / زيت الذره/ الفول السوداني
Gamma-linoleic acid:
زيت لسان الثور / زهرة الربيع / زيت الكشمش الأسود / حليب الإنسان / وبعض الفطريات
Arachidonic acid
الدهون الحيوانيه وصفار البيض
مماذكر شتحسون انكم تستهلكونه بكمية اعلى؟
اكيد الاوميغا 6
هالمعلومه لاتقلل اهمية اي مما ذكر لان الاثنين يلعبون دور في النمو وخاصه بالاوعية الدموية والاعصاب.. وتحمي على يفاعة الانسجة.. ولكن تظهرلكم اهمية استهلاك هالزيوت باعتدال وتوازن وبنسبه صحيحة.
فبالنظام الغذائي الحالي يستهلك الانسان اوميغا سته من عشره الى عشرين ضعف عن اوميغا ثلاثه.
وهالنسبه كبيره جدا.. لان النسبه الصحيحة هي من واحد لواحد.. وبعض الدراسات راحت امثر شوي وخلت بحبوحة
2:1 and 4:1
مدلعينكم يلا شتبون بعد
وفي دراسه مهمه سواها المعهد الوطني للصحة سنة تسعه وتسعين وقال شوفوا بعطيكم نسبة افضل شي وبريحكم
تكون الكمية ثلاثة بالامية من مجمل الكالوريز من اوميغا سته
3% (omega6 EFA)
ونسبة واحد بالامية من مجمل الكالوريز من اوميغا ثلاثه
1% (Omega3 ALA)
0.1% DHA
0.1% EPA
ماعتقد هالنسب عملية ?? ولكن المغزى ان اجتمع الكل ما تتعدى الاوميغا سته ثلاث اضعاف الاوميغا ثلاثه.
فالنسبه الصحيحة بينهم تلعب في ليونة غشاء الخلية الي من خلالها تتم تقريبا كل التفاعلات الكيميائية بالجسم اعتمادا على التوازن الصحيح بين هالزيتين.
الي ابي اوصله هو المقارنه الي بالصوره فوق ??. انزين شالمشكله اذا الاثنين مهمين؟
جسم الانسان يكون أجسام او مواد ترتب العمليات الكيميائيه باجسادنا واهيا انواع.. انواع تخفف الانفلاميشن (الالتهابات) ونوع يزود الانفلاميشن.
ولقوا ان اوميغا سته يكون ماده تزود الالتهابات بالجسم
للي يحب يعرف اسم الماده هي
Series 2 prostaglandins (PGE2s)
هالماده تحفز الجسم يسوي رد فعل ملهب بحيث يخلي الشعيرات الدمويه تتقلص والصفايح تتكدس فوق بعض..وهذا رد فعل الجسم الصحيح ولكن بهالحاله عند زيادة الاوميغا سته هي اشاره خاطئة للجسم .
ومن سنة تسعين دراسه ورا دراسه اثبتت ان عدم هالتوازن سبب التالي :
مرض السكر الاول
السمنه المفرطه
او خسارة الوزن المفرطة
امراض القلب
زهايمر
روماتيزم
ولازال الكثير.... لان يندرج تحتها كل الامراض الي ممكن يكون سببها التهاب بأي جزء من اجزاء الجسم.
لذلك وايد انصح لاتاكلون فول سوداني ولا زيوت نفس دوار الشمس لان نسبة اوميغا سته لاوميغا ثلاثه عاليه جدا.
شوفوا القائمه الي ??.. اختاروا اكثر شي الي فيها توازن بين الاومبغا ثلاثه وسته.
وياحلو زبدتي وجوزي الهندي ??.. وصلت المعلومه؟
ليست هناك تعليقات:
إرسال تعليق