الأواني الصحية

الأواني الصحية

السؤال المنتشر حديثا؟ شنو اصح قدور او مقالي نستخدمها للطبخ وماتضرنا؟ 

يقول التيفال سام يقولون الالمنيوم سام يقولون الستينلس ستيل مو زين ويقولون و و و واحترنا شنسوي!! خل نبسطها احنا ناكل ثلاث وجبات رئيسية باليوم ووجبتين سناك او اكثر..

 معظم وجباتنا مطبوخه لسهولة هضمها.. طبعا في ناس معتمده نظام الاكل الني في حياتها وطبعا ما أشجع هالنظام ولي وقفات معاه باذن الله لكن خنركز بموضوعنا.. معناها احنا نستخدم قدور الطبخ بحياتنا يوميا واكثر من مره في اليوم.. معناها لازم نحرص انها تكون ذات جودة عاليه... ليه؟ لان الاكل لمن ينطبخ يتفاعل مع المادة الي فيه بفعل الحرارة او البرودة الشديدة او حتى الحمض الي بحتوي عليه.. جميل؟ 

جميل.. فاذا استخدمنا ألمنيوم راح يعطينا المنيوم في اكلنا بدرجات متفاوته ومع كثرة الاستخدام والسنين كله يدخل اجسادنا.. والكل يدري الالمنيوم تأثيرة شنيع على الدماغ ?? واحد اسباب الزهايمر.

خلاص نروح للتيفال او اي منتج شبيه.. التيفال من اجود واسهل الاواني المنزلية لاتلصق وسهلة بالتنظيف الخ الخ.. ولكن مادة التيفلون الي فيها هي مادة كربونية من مشتقات البترول ويستخدمونها برصف القار بالشارع شمشكلتها انها مادة مسرطنه وتسبب اضطرابات بالجهاز الهضمي ولمن تنحك يصير الضرر مضاعف لان الأساس المنيوم مغطى بالتيفلون.. ويه عيل نخليه على صوب. 

نروح للستينلس ستيل 

الستينلس ستيل هو عباره عن خمطة معادن غير قابله للصدأ نيكل وكروم وغيرها غير موصله جيده للحراره وتتأكسد الا اذا حسنوها بوضع قاعده نحاسيه ثقيله في اسفلها.. ولانها مصنوعه من معادن مختلفه فتأثيرها يكون مختلف بتأكسدها مع الاغذية.. زين وبعدين؟ 

عيل نستخدم البايركس؟ 

البايركس عباره عن رمل زجاجي ورصاص.. يعني بنبلع الرصاص الي راح يذوب في الماء ??

خلاص اخر شي نروح للسيراميك 

اكثر السيراميك ملون ويحتوي على الرصاص والكادميوم وراح يدخل اجسامكم بكل سهولة ??

زين الحل؟! لو كملت انواع القدور مارح اخلص تعالوا نعطيكم الحل ??

...............................................................

حلي مارح يعجب الكل لكن باذن الله راح يفيد الكل بحسب حاجته. 

يعني شلون؟ 

اواني حديد الزهر ممتازة وموصلة جيده للحرارة لكن عيبها ثقيله جدا وتحتاج عناية خاصه.. زين اذا عندكم نقص حديد باجسامكم استخدموه ????

لان مثل ماقلتلكم راح يتسرب اجسامكم اما اذا عندكم زيادة حديد فاتمنى تنسونهم نهائي. 

نروح اناملد كاست ايرون 

Enamelled cast iron 

الافضل للان.. عباره عن حديد زهر مغطى بطبقة زجاجية عيبه الوحيد انه ثقيل يعني طيحته ممكن تكسر ريل راس انتو وحظكم.. وسعره شوي غالي.. لكن ضمانها مدى الحياه فممكن تستثمرون فلوسكم فيها انا للحين شريت قدرين والتاوة حديد. 

تبون تطبخون بالفرن فمافي اجمل من الاواني الفخارية الخالية من الالوان.. للاسف للحين خسرت ثلاثه حظي مو شي معاهم. 

في اواني جديدة يسوون عليها دعاية انها صديقة للبيئة وجدي للاسف مالقيت دراسات تثبت شالمواد المصنوعه منها. 

لذلك الي يستخدم الستينلس ستيل مايقطهم خلكم عليهم وياحبذا لو نوعية ممتازة ذات قواعد نحاسية. 

اصلا طنجرة الضغط عندي ماتتوفر الا المنيوم وستينلس ستيل واحتاجها في الاوقات الصعبه. 

البايركس استخدميها بشكل غير يومي واستخدمي بدالها الفخار ترا الاكل حيل لذيذ بالفخار والذ من البايركس عن تجربة. 

اما التيفال لاتستخدمينه مابقول نهائي ولكن فقط للشغلات الحيل صعبه وتلزق وودج نتيجة مرضية .. وجدديها باستمرار... يعني القدور الي من ايام جهاز عرسج ?? تنقط وفورا.. شكرا عفوا ????

اعتقد مرونه اكثر من جذي عمري ماكتبت ??.. وتذكروا كل تغيير يبيله مراحل بس لازم تحطون هدف خلال السنه المقبله بيكون كل الي عندي صحي او خلال السنتين وهكذا. 

وربي يحفظ عليكم نعمة الصحة والعافية.

ماهي الاواني الصحية؟! تبون الصج اكثر موضوع تعبني وبحثت وقريت فيه من ساعة مافتحت بروفايلي..

ابي اوصل لاجابه مرضية تقنعني علشان اوصلها لكم.. انتوا تعرفوني اني حتى لو نصحت بشي وثبتلي عكسة لازم اكتبه.. هذه هي مهمة الباحث الوصول للحقيقة. 

اخر نتيجة سابقة وصلت لها ان قدور حديد الزهر المطلي بالزجاج هي من اجود انواع القدور الموجودة بالسوق.. وقالولي الخوات التيتانيوم.. للاسف لاهذا ولاهذا ولي اسبابي وبحطها. 

خل نبدأ بتحليل قدور الحديد المطلية بالزجاج.. للاسف الشديد كلها مصنوعه من خليط زجاج ورصاص وليس هذا فقط بل وأكسيد بعض المعادن الاخرى لاعطاءها الوان براقه من ازرق وابيض واحمر واسود. 

هل هذا فقط.. صديقتي صار لها حادث امس كانت تحمس بصل فقط بالقدر وتكسر البورسلان وتطشر وربي ستر ولطف والصوره ظاهره فوق على الشمال. 

والنوع الي عندها اسم معروف عندنا ومشهور.. وباذن الله تاخذ حقها منهم.. هذا بتحليلي بسبب عدم خلطهم كمية صحيحة من البورسلان مع الرصاص لتقويته. 

بس كل يوم اقتنع ان قدور الحديد الغير مغلف هي الاقوى بس عنايته هي المتعبه ووزنه بكل تأكيد.. في تقارير تقول ان الحديد الغير اورغانك يعني كما في الطبيعه ضار للجسم عكس الاورغانك الموجود بالطعام.

منطقيا صح.. لكن يتم ارحم من باقي المعادن وكافي توزيعه الصحيح للحراره. 

انزين وشنو بالنسبه للتيتانيوم.. قابلت قبل امس وكيل يبيعهم في كوسكو.. والنتيجة.. قدور التيتانيوم الي كانت عنده هي عباره عن المنيوم كقاعده لتوزيع الحراره ومطليه بتيتانيوم ثم بورسلان ومايدري اذا فيه رصاص ولا لأ.. ويقول لي عادي التيتانيوم مو خطر والدليل زراعته بجسم الانسان من سنين.. قلتله صح بس بجسم الانسان مانسخنه لدرجات عاليه جدا تصل لاكثر من خمسمية فهرنهايت.. هني سكت وانحرج وكرهني ??

هل هناك قدور صحية؟! الحواب لأ.. والاختيار راجع لكم لحد يسألني شنو نشتري..لاني تعبت ومابحط بذمتي ضرر أحد.. والسموحة.