البروتين
البروتين
لمن اتكلم عن البروتين يعني اتكلم عن عشرين بالامية من وزن الانسان فيه بروتين.
ولمن اقول بروتين فمو لازم فقط ?? لحم بل نبات ?? ايضا.
انزين شنو الفرق وشنو اهمية البروتين وهل ممكن نعيش من غيره؟
شفتو أهمية الماي والكربوهدرات وكذلك البروتين محد يقدر يستغني عنه.. فالعضلات والشعر والاظافر والجلد والعيون والاعضاء الداخليه وخاصه القلب والدماغ اهم مكون فيهم البروتين.. المناعه تبي بروتين علشان تكون الاجسام المضاده الي تحمينا.. الهيموغلوبين الي يحمل الاكسجين بالدم يبي بروتين.. الهرمونات الي لو اختلت احنا نضيع تحتاج بروتين.. نمو الجسد وصيانة وتجديد انسجته تحتاج بروتين.
تكوين البروتين عباره عن كربون / اكسجين / هيروجين /نيتروجين.
شنو الفرق عن الكربوهدرات هو مكون واحد النيتروجين.
انزين يعني لمن ناكل بروتين يتخزن باجسامنا كما هو؟
لأ البروتين جزيء معقد شوي وعلشان يتفكك لامينو اسيدز (احماض امينية) نحتاج حمض معده قوي وانزيمات.
فاهمية البروتين بالاحماض الامينية الي فيه.
وابي ادلعكم بهالموضوع علشان اي احد نباتي بحت (فيغان) يفكر بصحته ميت مره قبل لايتخذ هالقرار..بالدليل العلمي والنظري والتاريخي.
علشان نفهم اهمية البروتين بحياتنا لازم نفهم الاحماض الامينيه وتقسيماتها.
في احماض امينية أساسيه واحماض غير اساسيه..
الاساسيه مايقدر الجسم ينتجها ولازم ياخذها من مصدر غذائي.. وغير اساسيه ممكن الجسم ينتجها من الاحماض الاساسيه وبتغذية سليمه صحيه متكامله.
الاساسيه هي :
Histidine /Isoleucine / leucine / lysine / methionine/ phenylalanine /threonine /tryptophan/ valine.
ادري محد قراهم ????? ولكن عدلوا على هالنظريه شغله صغنطوطه.. ان في احماض امينيه كانوا يعتبروها غير اساسيه يعني ممكن تكون بالجسم مثل ماقلنا.. ولكن لقوا اهميتها بصنع احماض امينية ثانيه فسووا قائمه اسمها احماض امينية اساسيه مشروطه.
يعني غير اساسيه ولكن ببعض الاحيان اساسيه لها دورين.
ضعتوا??.. ماعليه بس حبيت اعرفكم انهم ثلاثه انواع مو بس اثنين..
النقطه الي ابيها مما سبق ان كل شي مهم لتعبئة خزان اجسامنا من الاحماض الامينيه الاساسيه.
تخيلوا الجسم حوض كبير لمن ناكل يخزن فيه الاحماض الامينيه ولمن يحتاجها ياخذ منها مو شرط يستهلكها كلها على حسب احتياجة ولكن اذا نضب هالخزان ليلتكم سوده راح يضطر يهدم الي بناه وياخذ منه.
وهني الكارثه.
انزين نقسم الاكل لقسمين بروتين كامل وغير كامل.
الكامل هو الحيواني بلاشك.. فيها كل الاحماض الاساسيه.(لحم بانواعه / سمك / بيض /حليب)
الغير كامل هو النباتي خضار وبقول ومكسرات وبذور وحبوب.
يعني الي ياكل بروتين حيواني لو فقط بيض او حليب فهو بالسليم..
اما النباتي فلازم ياخذ حذره .. لان لازم يكون عنده معرفه قويه بطريقة دمج الانواع.. يالله يقدر ياخذ الأحماض الأمينية كلها .
تذكروا مثال الحوض.. يعني مو لازم كل وجبه فيها بروتين حيواني.. وهذا الشي الي الناس تتخربط فيه.. كافي مره باليوم.. استاذتي تجادلني ان حتى لو مره باليومين.. اممممم اختلف معاها وخاصه للانسان العامل الي يتحرك وايد ويستهلك عضل.. الخزان بيفرغ بسرعه والهدم بيكون اسرع من غير لايحس.. راح يحس عقب فتره مو فورا.
بس ليش النباتيين صحيين؟
لان النبات اساس تطهير الجسد مو اللحم.. يعني اي اقدر اطهر جسمي فتره صغيره.. بس تذكر ان خزان الجسم قاعد ينضب.. فيبدأ الم جديد بعضلاته او شكله يصير هزيل ومرهق.
لاتنخدعون بالابطال النباتيين لانهم ياخذون مكملات نباتيه مضبطه بالمختبر بحيث يقدرون ياخذون كمشة احماض امينيه من اكثر من نوع بتخمير او استنبات وبكميات كبيره مركزه غير متوفره طبيعيا.
الدليل النظري :
اسنان الإنسان فيها الانياب .. لم تخلق من غير سبب ولكن عددها قليل وهذا دليل كافي انها شي مو لازم بكثرته.
الدليل التاربخي:
مافي شعب مر بكتب تاريخيه وخاصه الي ياكلون تسعين بالاميه نباتي الا كان العشره بالاميه حليب لو لبن او بيض.
بس مابزعل النباتيين الي فقط مخففين اللحوم لعدم توفره من مصادر صحية نظيفه. ???
والفكره جدا سهله.
دام كل شي نباتي ناقص.. اجمعوهم مع بعض.. يعني حبوب مع بقول اوبذور
خنقول كليتوا دخن ناكل مع فاصوليا.. او بقول مع ذره او رز.
وقريبا بيكون عندي فكره اوسع وأشمل في عمل اطباق متكامله نباتيه.. ليش مهتمه لاني مثل ما ادافع عن فكره ان فقط البروتينات الكامله حيوانيه ايضا ادافع عن فكرة ان النباتات تكملها.
نصيحة من عليا: خلكم نباتيين طول النهار استمتعوا.. واخر وجبه خل فيها مصدر حيواني.. فخلال النهار الهدم سريع والنباتي رائع لهالوقت من انزيمات وتنظيف وبنفس الوقت طاقه وبروتينات.. وكملوا اي نقص بالخزان بمصدر حيواني جاهز للبناء ليلا.
انزين شلون ينهضم؟
مارح اشرحه الحين بناخذه بدرس بروحه.
ولكن منو الي يوزع البروتينات بالجسم بعض ماينهضم؟ الكبد
وسبحان الخالق مو بس الاحماض الامينية الجديده فقط بل الريسايكل بعد من الخلايا القديمه.
كل يوم بحياتنا يتكون بروتين بعملية البناء
Anabolism
ولابد يكون فيه هدم
Catabolism
محاوله من الجسم ان يوازن النيتروجين.. الي قلنا مو موجود الا بالبروتين.
طيب لو زاد استهلاكنا للبروتين راح يزيد النيتروجين يعني زاد البناء والنمو ولو قل زاد الهدم.
ولكن مافي بناء مايوقف لازم يوقف علشان لايصير خلل.. هذي قاعده.
وقاعدة اجسامنا هو معادلة الهدم بالبناء.
انزين لو زاد البروتين وايد وين يروح.. اختلفوا انه راح يتعبى غلايكوجين بالعضلات او دهون تتخزن بالجسم كطاقه.
مو هني المشكله.. مادري ليه دايم يركز الشخص على الناحيه الي تهمه متناسي ان هالجسم كتله متكامله.
فالرباضي او المدرب بو ضخامة يصك البروتين العداد.. يطرش الجسم تطريش بحجة ان البروتين بناء وعضل.. انزين ياعم الحج هالبروتين علشان يصير بناء هد حيل الجسم.. لانه معقد وهضمه بطيء استهلك حمض المعده واستهلك انزيمات البنكرياس وفوق هذا يطلع منتجات ثانويه سامه وخاصه عند تأخير هضمه.
ولاتنسوا ان دايما الي ياكل بروتين عالي يفتقد الالياف العاليه الي تسرع شوي خروجه
بالاضافه لزيادة حمضية الجسد وبالتالي سحب الكالسيوم من العظام.. لان أيضا الي يستهلك البروتين العالي نفس البادي بيلدرز يلغون الدهون المشبعه بحجة التنشيف لابراز العضل وبالتالي نقص فيتامينات ذائبه بالدهون اساسيه.
بالاضافه للمنتجات الثانويه من النيتروجين الي يبي يتخلص منها الجسد ترهق الكلى وخطره للي عندهم مشاكل بالكلى.
الشعوب الي كانت تعيش على كميات عاليه من البروتين الحيواني ماكانوا ياكلون كل شي مطبوخ فالانزيمات باجسادهم عاليه.. كانوا ياكلونه بجلده ودهنه كامل يعني بكل فيتاميناته ومعادنه من غير فصل.. كانوا اقوياء يستخدمون هالبروتين صج لبناء أجساد قويه.. وتذكروا ان جسم الإنسان دوما يتأقلم مع المحيط والعقل يتبرمج على خدمة الجسد على حسب الظرف.
لذلك أنا ضد الانظمه الي تعتمد على اللحوم فقط وخاصه ان اجسامنا تهالكت.. لافيها حمض معده كافي ولا قوة لانتاج انزيمات كافيه.
احزن لمن اشوف مدرب او مدربه بكامل صحتهم وعافيتهم.. وياخذون حبوب حمض معده وانزيمات مع كل وجبه.. لانهم يدرون ان الي عندهم باجسادهم مو كفايه.
انا ما اقول غلط لان اعتقد كلنا صرنا محتاجين هالشي.. بس احزن لانه يدري ان هالشي بيهلك جسمه ومستمر.
ليست هناك تعليقات:
إرسال تعليق