الكبريت
راجع موضوع البروتين لأنه مرتبط معه*
الكبريت المعدن المجهول
كل الشكر لاستاذ باسل على اضافاته دوما.. والهمني اكتب هالموضوع.
شكو الكبريت الحين؟
هالكبريت بو ريحه خايسه.. ??.. ماراح تنسونه ريحة بيض معفن هذا هو الكبريت بس كلامنا اليوم عن الكبريت العضوي الي بالاكل.
مجهول لان دراسات التغذيه ماتركز عليه بالرغم من اهميته.
اكتشفت من يومين روعة هالمعدن بالرغم من وفرته الا ان ثلاث ارباع الناس عندهم نقص منه.
انزين خنشوف وظيفته ونحكم هل هو مهم او لأ واعطيكم نقطتي من هالموضوع.
جسم الانسان يحتوي على كمية كبريت مساوية لكمية البوتاسيوم وكلها موجوده بالبروتين والخلايا والانسجة.
اممممم بروتين / انسجة.. شيعطيكم هالشي احساس؟
بروتين_ امينو اسيدز_ كبريت
بالضبط الكبريت هو الي ماسك الامينو اسيدز.. يعني هو الرابط الي يكون البروتين ويفكه.
الكبريت موجود باربع احماض امينية
Methionine_ cystine /cysteine /taurine
مو بس
وموجود في فيتامين باء
Thiamin / biotin
هالاثنين اكيد تعرفونهم عدل ثلاث ارباع الناس تبلبع فيهم حق الاظافر والشعر.. ركزوا شوي وخلكم معاي
من وين نقدر نحصل هالمعدن؟
اهوا جاهز بكل تاكيد في كل اكل يحتوي هالاربع امينات الي ذكرتها فوق ??. يعني طبعا البروتينات الحيوانيه وبكل سهوله ولاننسى مرق العظم الغنية..والبقول كلها مصادر ممتازه ولكن صفار البيض اقواها.
ولكن في بعض الخضار نفس الثوم /البصل/الملفوف/البيبي ملفوف/الكيل/البروكلي/السلق/والخس/الكِلب والطحالب البحريه.
وفي شوي ببعض المكسرات والتوت الاحمر.
هل معقوله موجود بكثره وعندنا نقص؟
مشكلته ان محد يقدر يكتشفه يعني بيقولونلكم عندكم نقص بروتين ولكن بالاصل عندكم نقص كبريت او نقص بهالاربع احماض امينية.
اهمية هالمعدن مو بس يقتصر على تكوين البروتين وتفكيكة بل وفي صنع الانسولين الاساسي في التمثيل الغذائي للكربوهدرات والهيبارين الي يمنع التجلطات.. وصنع سائل المراره.. وصنع البايوتين/والانزيم المساعد أ/حمض الليبويك/والغلوتاثيون.
وحتى أنسجة خلايا المفاصل.
ومهم في ادخال الأكسجين لداخل الخليه يعني مهم لكل خليه وخاصه الدماغ.
وظايف الكبريت.. التخلص من السموم ??
الي يعرف الكيميا يعرف ان رقم الكبريت بالتسلسل المعدني هو 16
والي يحب الكيميا نفسي ?? فورا راح يستوعب ان الكبريت تركيبه الايوني جاذب دايما يحتاج اثنين الكترون علشان يشبع.
2/8/6
S2-
It has 3 energy levels with 6 electrons in the valence shell.. And it needs to gain 2 electrons to fill its valence shell ???
يعني روعه كتنظيف للجسم من المعادن الثقيله?
مو بس معادن ثقيله بل السموم ككل.
انزين ناكل بروتين حيواني وناكل كل مصادر الكبريت شلون يصير عندنا نقص؟! سلمكم الله السبب هو نفس السبب الي فوق ??.. خاصية الجذب بالسلفر تخلي خسارتنا له اكبر وخاصه خاااااااااصه لو اجسادنا معبأه بالسموم.
مو بس سموم حتى الاستروجين يعشق الكبريت ويجذبه.. وينظم دخوله الخلايا.
كثرة استخداماته الداخليه مقارنه مع الكمية الي داخله تخلينا بكل تأكيد عايشين بنقص في هالمعدن الكنز.
نرجع للسؤال شكو هالموضوع بالبروتين؟
ان احنا مو محتاجين لكميات كبيره من البروتين احنا محتاجين كبريت يسرع من تكوين البروتين وتفكيكة لاحماض امينية تبني العضل والانسجة واي شي محتاج بروتين.
وصلت ???
ليست هناك تعليقات:
إرسال تعليق