البنات: مارح اخذ فيتامينات ترا الفيتامينات تمتن!
هذا الفيتامين لو خذيته بمتن؟
حبيت اطرح الموضوع اليوم علشان اوصل المعلومه وكالعاده بطريقتي
تعالوا نفهم اول شي شنو الفيتامينات؟
الفيتامينات هي عباره عن مركبات عضوية (فيها كربون وهيدروجين) موجوده بكل الاكل النباتي والحيواني ومو بس جذي وممكن البكتيريا تنتجها نفس فيتامينات باء.. او ينتجها الجلد اذا تعرض للشمس نفس فيتامين دال.
وجودها جدا مهم وخاصه للتمثيل الغذائي للبروتينات والدهون والكربوهدرات.
مو بس الفيتامينات مهمه فقط ولكن المعادن ايضا وخلل اي منها راح يسبب مشاكل بالجسم.. بالرغم ان حاجتنا ماتطلع حجم ثمن ملعقة صغيره ولكن تأثيرها كبير جدا.
تمام معاي
خلاص نعيش على حبة تعطينا الفيتامينات والمعادن الاساسيه وكفايه.
المشكله الأساسية بهالنقطه هي التالي :
ربي الحكيم خلق الكون بكل مافيه مرتبط ببعض.. شلون خل نكتب مثال صغيرون :
الجزره : فيها ماي / كربوهدرات/بروتين/فسفور/صوديوم/بوتاسيوم/فيتامينات باء/الياف (الي تنمضغ) /وفيتامين أ.
وعلشان الجزره تنهضم تشتغل هالمعادن والفيتامينات مع بعض في اجسادنا.
ولكن مثل ما هالجزره فيها كود برمجة من ساعة نموها لي هضمها.. اجسادنا كذلك فيها اكواد برمجة علشان تتعرف عالجزره وتتعاون معاها لهضمها.. تمام
لكن اليوم ماخذينا هالجزره وخذينا حبة فيتامين أ.. بلعناها بحبة فيها شوية سكر ونشا ودخلت جسمنا.. الجسم بيكون في حالة صدمة شنو هذا الي قطيتوه فيني انا متعود امضغ شي علشان اطلع الفيتامين.. فيدز لكم اشارات خاطئة ناقص المضغ ياعم ياللي قطيت فيني هالشي روح امضغ وتعال.. فتحسون بشي غريب ماندري ليه ينفتح نفسنا عالاكل.
موبس جذي.. راح يدور الجسم على باقي الفيتامينات والمعادن المرتبطه معاه الي مفروض تكون بالجزره.. فلما مايلقاهم راح يسحب بكل مره تاخذون فيتامين بروحه من خزان المعادن الي عندكم وبالتالي نقصه باجسامكم وطلبه الحاد له.
انزين شيصير لو خذينا فيتامين وجسمنا مو محتاجة
بالأول لازم تعرفون ان برمجة الفيتامينات في اجسادنا مرتبطه ببعضها البعض ومع المعادن فلو قدمنا لجسمنا فيتامين معزول غير مرتبط بباقي المعادن والفيتامينات الي ربي كونها راح يسوي عدم اتزان بأجسادنا.. والجسم راح يطلبه فورا من دماغكم او راح يسحب النقص من خزان المعادن والفيتامينات باجسادكم.
للاسف الشديد نصيحة المهتمين بالصحه ان الفيتامينات شي طبيعي ومافي منه اي ضرر فاذا زاد تخلص منه الجسم بسهوله.
وهذي النقطه الي ابي اوصلها بهذا الجزء
هذا للاسف كلام صحيح اميه بالامية.. الجسم لو لقى خزان جسمك مليان راح يقط الزايد ويتخلص منه.. ولكن هل احد فكر شلون اجسامنا تتخلص من الفائض؟
الجسم فيه كليتين/امعاء/رئتين/جلد أعضاء خاصه بالتخلص من فضلات الجسم الزايد .. في قصة مره قريتها عن وحده تاكل صحي بس تعاني من حبوب بجسمها مع العلم ماتاكل دهون عاليه ولا حليب ولكن من خوفها يكون عندها نقص بجسمها تاخذ حوالي عشرين حبة فيتامين في اليوم.
واول ماوقفت الفيتامينات راحت الحبوب من جسمها كليا.. هذي القصه تدل ان جسمها فيه فائض هائل من الفيتامينات وخاصه انها تاكل صحي فتخلص جسمها من الفائض عن طريق جلدها.
يعني المقوله صحيحه ان الجسم راح يتخلص من الفائض ولكن ممكن يزود الكوارث مثل هالحاله الي ذكرتها او يرهق الكلاوي الخ.
تمام
النقطه هني ان الفيتامينات مصنعه كانت او طبيعية لازم تعتبر ادوية.. محد محتاج فيتامين اذا كان ياكل صحي.. واذا ماياكل صحي وكل اكله عباره عن سكر وطحين ابيض وفاست فود.. نعم يحتاج فيتامينات ولكن باشراف مختص مستوعب شقاعد يسوي يعرف ارتباط الفيتامينات والمعادن ببعض.
وحتى لو تعالجتوا راح يكون معالجة مؤقته ان لم تحسنوا غذاءكم الي هو دواءكم.
نظامكم الغذائي لازم يكون نظام كامل متكامل.. وحبوب فيتاميناتكم تكون كالتالي :
حبوب وبقول كامله مستنبته غير مقشوره ولا معالجة.
اوراق خضرا فرش غامقه نيه ومطبوخه.
قرع بانواعه ونباتات جذرية.
كل الخضار والفواكه بانواعها مطبوخه ونية.
خضار بحري بس تقنينها لمره او مرتين بالاسبوع بالكثير.
اكل مخمر طبيعيا غني باللاكتوباسيلس.
كبد الحيوانات حصه بالاسبوع ومرق العظم يوميا لو قدرتوا.
الابتعاد كليا عن مسببات الحساسيه.. شلون تعرفونها ؟؟ شرحتها في موضوع منفصل
ليست هناك تعليقات:
إرسال تعليق