كل يوم الاحظ تكرار نفس الاسئلة.. شنو افضل دايت.. هذا الاكل شنو فايدته.. شنو اكل علشان اتعالج من كذا وكذا.
خل نبسطها وناخذها حبه حبه
مو لازم تكونوا علماء علشان تاكلون صح.. ولا تنطرون نصيحه مني او من فلان او علان علشان تاكلون صح.. تدرون ليه.. لان فطرة الانسان السليمه لو شغلتوها راح تعرفون الصح من الغلط.
مافي شي اسمه هذا الاكل شنو فوايده؟
في شي اسمه دام اكل طبيعي انزرع وانحصد كما خلقه ربي في بيئتكم فهذا كله فايده وصحه.
مافي شي اسمه هالدايت هو الحل لا الماكروبايوتك ولا الهاي كارب ولا النباتي ولا الباليو هو الحل الوحيد.. لاني ممكن اييب لكم ناس تعالجت من كل الاختيارات الي فوق
ليش وشلون؟
الحل جدا بسيط الناس فقط حولت اكلها المليان سموم لاكل انظف واصح فتعالجت وشهرت الدايت الي يمشون عليه.
برأيي مافي دايت يمشي عالكل ولا في دايت صارم هو الحل.
الحل ببساطه ينقسم لقسمين
اختيار الاكل الصحي الطبيعي الغير معالج سواء نباتي او حيواني كما خلقه ربي وليس كما غيره البشر بغباءهم.
سماع صوت جسدكم.. فاذا يعاني من شي حتى لو هالشي طبيعي.. توقيفه فورا.. فهم اجسادكم هي اول حل لمشاكلكم كلها.
لو تدرون شكثر هالنقطه فادتني بحساسيتي.. وكنت خاشه لكم هالخبر وايد من الاصناف الي تحسست منها طلعت.. واجملها الكاجو رجعت اكله بسهوله.. ووايد اسماك وخاصه البحريه رديت اكلها.. باقيلي السمسم.. كليت ذاك اليوم بسكوته رفيجتي مسويتها عليها سمسم ماحسيت بشي بس لمن جربت الطحينه كانت متعبه شوي.. وللحين اقدر اصيد السولفايت والام اس جي ومشتقات الحليب الغير عضوية.
الي احسه رقعه بالقلب.. او بعد فتره طقه بالصدر.. او عوار مفاصل ورقبه خاصه من مشتقات الحليب الغير عضوية المبستره.
للعلم ولا شي من الي ذكرته ظاهر بتحليل الدم او الجلد الا شوية انواع سمك.. والسبب ان الحساسية خفيفه ومو ظاهره.. ولكن لاني افهم جسمي واعرف كل شي تغير فيه صدت كل شي يضايقه ووقفته حتى لو هالشي صحي.
?
ليست هناك تعليقات:
إرسال تعليق