علاج القلب والروح
اليوم بتكلم عن شي خارج العلاج بالتغذية ولكن مرتبط فيه..من فترة مرت علي حاله غريبه.. اول مره احس شكثر انا مقصره بمواضيع الروح والنفس.
ادري ان مثيلاتي في هالتخصص يعالجون بالطاقه..وهذا شي اجباري بتخصصنا ولكن بفضل الله قدرت افصل بين علاج الطاقه وعلاج الروح.. بقولكم شي قبل لا ابدأ.. الي يؤمنون بالطاقه هذا علم وعلم قديم ماقدر الغيه وعالج ناس وايد.. بس لان هالناس عزفوا عن الطريق السليم ومتى ما انعدلت حياتهم انعدلت صحتهم.. قاعده جدا بسيطة.. برأيي الهنود والصينين ماكان لهم دين فحطوا القواعد لاعادة التوازن السليم ..ولكن احنا عندنا اعظم دين يرجع ابو التوازن لاجسادنا.. فالطاقه هي الروح والفطره.. والروح من امر ربي...والفطره هي كل شي صح انفطرت اجسادنا وروحنا عليه... فلو سمحتوا مابي بصفحتي شي ينكتب عن الطاقه.. علشان المحاربين الاشداء نريح قلوبهم المريضه من جدال عقيم يأذيهم نفسيا واصبعيا من الكتابه
صدقوني لو ايماننا صحيح مارح يكون فيه خلل ولا راح نحتاج لعلاجات الطاقه وكنا اصح الخلق
واذا احد اتهمكم بالجهل اياكم والجدال.. ردوا بهالجمله.. علم لاينفع وجهل لايضر :)
مثل ما قلت الطاقه هي الروح.. والروح مستقره بأجسادنا ومن غيرها يفنى الجسد.. هي الي تحركنا وتنبض قلوبنا.. وهالروح علمها عند ربي
ولكن تأثير الاحداث من حولنا وشخصياتنا وشعورنا وأحاسيسنا هي الي تسوي اختلال باجسادنا.. شلون؟
على سبيل المثال : انسان يحس ان فلوسه هي قوته (مصدر طاقته) نسي انه لاحول له ولاقوة.. فلمن يخسر فلوسه يحدث اختلال في هالركيزه الي استند عليها.. وبالتالي اختلال بجسده.. ممكن ينتحر.. تجيه سكته قلبيه.. يصيبه مرض مستعصي الخ... اخصائي الطاقه يقولون تعال نريحك تعال نرجعلك التوازن بالطاقات السبع
Seven shakras
تعال نقعد نتخيل تعال نعيش بسلام تعال نريح اعصابك بشوية
Meditation
Yoga
حركات ومساجات بسيطه تريح فيها اعصابك الخ
علاجي انا غير
قبل لاتصير الكارثه لازم ازرع فيه ان هالمال رزق من الله والى الله.. نعمه وليست مصدر قوه
لان الانسان لو تعلق فقط بربه مهما خسر بحياته مارح يتأثر.. نعم يحزن ولكن مارح يختل توازنه الجسدي.. لان الله مصدر توازن او بالاصح تعلق لايفنى
لازم يتدرب على التقرب من الله حتى لو كان كافر.. ادري مايجتمع بس عالاقل نفسيا.. الارتباط بشي دائم
لاني انا ما احاسب انا اعالج
المهم قبل لاتضيع السالفه
بكملكم القصة اللي صارت وحسيت بصاحبتها فيها حزن شديد مع العلم الحاله ماشتكت لي.. اهيا يت فقط تشتكي من شي.. واكتشفت ان الاكل ماله شغل.. لاول مره اعترف نعم مو الاكل.. لانها تأكل صحي.. بس تاكل بروحها كل يوم الى ان عدمت عافيتها
تغار على زوجها غيره قاتله.
لازم تعرفون ان افكارنا الداخلية تؤثر على اجسادنا.. وكمية القلق اهلك جسدها.. وكمية الخوف من خسارة زوجها (مصدر قوتها).. نفس مثال الفلوس الي ذكرناه.. الخوف من خسارته.. يعني خسارة قوتها
ذبحها واهلك جسدها المرهق.. هالحاله او مثيلاتهاماعندي لها علاج.. لكن دوري اخرعها اقولها حقيقه اهيا ماتبي تسمعها
خوفج هذا وشعورج بأنج مالكة زوجج بهالطريقة راح يعذبج نفسيا وجسديا فجهزي نفسج لامراض لها اول مالها اخر
ثقي بربج غيري على زوجج هذا شي طبيعي لكن مو عمياء.. ربي حلله اربع خليتزوج لو يبي
مافي شرط بدينا يقول ماتقدرين تخلينه بالاخر لو هو يبي هالشي راح يهدج ويروح
انتي ذابحه عمرج ليش؟
هل هو مصدر رزقج؟
شكلج نسيتي ان ربج هو مالك امرج!؟ لو ربي يبي يفلسه او يقعد من غير شغل بايده كل شي.. شبتسوين ساعتها؟
ارجعي لربج خل كلج ثقه ويقين فيه ان مارح يخليج ولمن تتقربين منه بيكون لج عون
والله لازوج ولا اهل ولا اولاد كله رايح
تحرري من هالتفكير وفورا وكلامي لكم كلكم.. قبل لاتشتكون من امراضكم فكوا هالنفس من سلاسلها.. تحرروا ولكن بدينكم الي هو كنزكم المفقود
ادري طولت عليكم بس التذكره مهمه بين فتره واخرى..?
كلامك سديد وجميييل ، واكثر ماجاب الامراض للنساء الرجال ووخصوصا اول مايتزوج ! لو كان عند النساء تعلق بالله وتوكيل الامر له كان ضاق صدرها شوي وخلاص لانها مؤمنه انه شي مكتوب وتحتسب الاجر ، لكن للاسف توصل ٤٥ مافيه مرض ماجاها وهي اللي جنت ع نفسها .
ردحذف