قصتي وتجربتي اكتبها لكل ام مغتربه متابعتني.
كل إنسان فينا يخاف ويرتعب من التغيير المفاجئ.. وخاصه لو هالتغيير ماندري شكثر راح ياخذ من حياتنا وعمرنا.
نعم هاجرت بروحي مع زوجي وابني الوحيد وكنت فقط بسوي لاندنغ وراجعه الكويت.. شقتي عفشي كل شي ناطرني.. وفجأه من غير مقدمات.. انا حامل.. بعد خسارة طفلين باشهرهم الاولى خلال اربع سنين وصعوبة حمل بسبب التكيسات.. صدمه فرح مطعم برهبه.. ربي وهبلي الي ابيه والي عانيت مع الدكاتره علشان يصير من غير هرمونات ولا ابر.. انا حامل..سبحانك ربي.. انه على كل شيء قدير.. وحان موعد السفر ولكني فضلت اقعد علشان احافظ على جنيني خوفا من ارهاق السفر.. مارح استحمل خساره جديده.. وبالفعل قعدت بروحي ماعندي سياره ومعي عمر.. ربي سخرلي بنت خالتي تونسني.. لكن كنت احس عمر وحيد يبي يلعب مع احد بعمره.. فقلت ادخله حضانة اطفال اخليه جم ساعه يلعب ويستانس.. كانت الحضانه تحت بيتي.. فسجلت ابني فيها.. وكل ما اوديه تقعد تسلم علي مديرة الحضانه وتسألني عن دراستي وحياتي وجذي.. وبيوم تقول لي شرايج تشتغلين عندي.. ابي احد يعتني بالاطفال.. تبون الصج فرحت.. ركدت البيت اخبر زوجي واشوف شنو رأيه بالموضوع.. حمسني حيل علشان لا ازهق بروحي.. وهو مستانس اكثر انه تحت البيت فماراح اتوهق بالطريج.. وبالفعل اشتغلت كحاضنه في قسم الاطفال وكانت اجمل ايام حياتي ولدي معاي يومي مشغول بالخير.. تدريب رائع لمسك الاعصاب وتجديد خبرتي في التعامل مع الاطفال.. ربي جهزني تماما لحياتي القادمه.. قعدت اشتغل 7 شهور.. رجع زوجي من الكويت بعد ماخلص اموره الخاصه بوظيفته وبيتنا الخ الخ
تركت الوظيفه بعد عودة زوجي ونطرت استقبال عروستي.. ربي رزقني بناردين بفضل الله تعالى
اعتقد من بين عيالي كلهم ناردين خذت العز كله.. جت بعد طول انتظار.. جت وانا بكامل هدوئي وقواي العقليه .. جت وزهرت البيت لان البنات دايما غير .. حتى عمر روحه زهرت عكس الحين .. وربي شاء ان تكون هالنعمه خير ورزق لأخوها.
تابع... وبعد سنه ونص تقريبا طلبت دكتورة ابني عمر اسوي فحص نخاع لناردين نشوف هل هي متطابقه مع عمر ام لا.. وباختصار عمر عنده مرض نادر بالدم نخاعه الشوكي فيه خلل ماينتج دم.. ما يتأثر بالاكل ولا بمثبطات المناعه وكان الحل الوحيد هو نقل دم او زرع نخاع.. وبالفعل تم فحص الاثنين لتكون ناردين هي نعمه من رب السماء لعمر.
قعدت مع نفسي اراجع خمس سنين ونص من عمري.. ربي أخر حملي بسبب الصعوبات الي واجهتها مع حالة عمر.. عمر صابه جلطة بالدماغ بعمر سنتين ونص.. وصابه نزيف بالدماغ بعمر الثلاث سنين.. وكان ياخذ دم كل اسبوعين وكان تحت كورتيزون لمدة سنتين وبس يمرض ممنوع يشوف احد وحجز بالمستشفى لاسبوع.. يعني التأخير كان بكل تأكيد لخير.. تخيلت لو معاي طفل وانا اراكد بالمستشفيات شلون بتكون حالتي.. رحمة ربي وسعت كل شيء.. بس طبع البني آدم دايما مستعجل.. فقط بالمكان الي بتصير فيه العمليه ربي رزقني ببنتي.. يارب ما ارحمك
ولكن بعدها جاء الاختبار الأصعب بحيااااااتي كلها.. كل الي مر شي والي شفته شي ثاني
..
كلنا كنا متحمسين للعملية لانها كانت الخيار الوحيد.. يا اما عمر يعيش على نقل الدم طول حياته وطبعا فيها مجازفه كبيره واثار جانبيه فظيعه.. يا اما نجازف بحياته ونسويله نقل النخاع.. اعطتني المستشفى كل المصادر إلى ممكن اقراها واتعرف على مخاطر العمليه وسمحولي اكلم عوايل سووها بس ولا احد كان نفس حالة ابني فكنت جدا خايفه.. فاستخرت وتوكلت على الله وجاني اتصال من وحده ابنها عنده بلاستك انيميا وسوت العمليه وقالتلي.. لو ردت الدنيا فيني ثلاث سنين كنت ماحندم ثانيه اني سويتها لاني ريحت ابني من نقل الدم.
كان شهر سبعه الفين وعشره.. رحت للمستشفى انا وزوجي ووقعنا الاوراق بالموافقه.. كنت بمدينه ثانيه وبألبرتا مقسمين العمليات الكبيره لمدينتين زرع الأعضاء في مدينتي الاوليه وزرع النخاع في مدينه ثانيه.. يعني شنو.. يعني نجهز الاولاد هني بادمنتون وتروحون كالغري للعمليه.. روحوا استكشفوا المستشفى وتعرفوا عالفريق الطبي وتطمنوا أكثر وبالفعل سوينا هالشي وارتحنا لهم جدا.. وتم تحديد العمليه ولكن..
أول سفره مرض عمر بفايروسة رشح عاديه فكنسلوا العمليه لازم الاثنين يكونون سليمين تماما.
ثاني سفره انصاب عيالي بفايروسة
hand-foot-and-mouth disease
ثالث سفره هم كنسلوها لظرف الدكتور.
رابع سفره ابتدوا باول جرعة كيماوي لعمر وفجأه تحاليله كانت انزيماته عاليه معناها عنده انفكشن بس مو ظاهر عليه وكنسلنا كل شي ورجعنا.
خامس سفره بنفس يوم سفري انكسر كاحلي وتم الغاء العملية الى أجل غير مسمى.
يارب شلي قاعد يصير نفسيتي تعبانه انا مكسوره عملية ولدي التغت.. حياتي عالمحك.. خسر زوجي وظيفته للسفر الكثير لكالغري.. ضغط اعصاب تعب ارهاق.. وللاسف افترقت عن زوجي.. انكسرت عيلتي الي بنيتها في ست سنين من سهر والم ومعاناة.
خسرت كل شي بلحظه.. ماكان عندي شي باقي الا ثقتي بالله انه مارح يتركني.. لانه الرحمن الرحيم.. وبيوم كلمتني المستشفى عليا شلون صرتي شلون صارت ريلج اذا تحسنتي احنا للحين ناطرينكم ولاتخافين مارح نلغي العملية دام مافي مانع قوي في حالة عمر .. كانت مرسال.. اني ما احزن ولا افقد الامل.. توكلت على الله جهزت جنطتي وانا بعكازتي حطيت عيالي وسافرت لكالغري ويومها لن انساه ابدا مطر مطر شديد طول الطريق.. ماوقفت دعاء ثلاث ساعات ونص.. ابي ربي ينورني شالغلط ليه البلاء علي شديد.
وانا بكالغري زوجي يدق علي عليا ببيع البيت.. وبلحظه يرن بأذوني قوله تعالى : فأذنوا بحرب من الله ورسوله.. فأذنوا بحرب من الله ورسوله.
شلون صار جذي وانا بغفله.
كله بسبب فتاوى الشيوخ اللي تحلل شراء بيت من البنوك الغير اسلامية بشرط تثبيت الفوايد
دقيت على زوجي قتله انا موافقه احضر كالغري فورا نخلص اوراق البيت.
والله مافكرت بشي.. ماعندي بيت ماعندي شي.. قاعده بالمستشفى ما ادري متى بيحددون العمليه واذا اتلغت وين بروح ولا شي فكرت فيه.. عند كل انسان دقمة اون وأوف انا فصلتها من فيوزها.. الكل خايف علي اهلي اصحابي.. وانا على كلمة كل شي تمام الحمدلله.
وصل زوجي خلصنا الاوراق انباع البيت خلال اسبوعين تمت عملية ابني بفضل الله تعالى.. طلعت حامل بشهري الثالث بعبدالرحمن.
انحلت مشاكلي كلها بلمح البصر.. بس كنت مرهقه جدا ما اكذب عليكم.. ولدي يتألم.. لازم اصمد لازم ما ابينله ضعفي لازم اقويه علشان يستمر.. وماقدر انتبه على بنتي اشوفها بس بالنهار وباقي اليوم مع زوجي لان ممنوع تنام معاي بالمستشفى.. واضطر زوجي يسافر الكويت وراحت بنتي معاه.. فصرت بهمين.. قلب مقسم أجزاء.. وهم مايعرفه الا رب العالمين.. اعتقد مافي شي خلاني استمر الا الدعاء.. مر مادري شكثر وقت مر علي ماعديت الايام وطلعت من المستشفى وبدأ ابني يتحسن ويتعافى ويقدر يشوف النور.. رجع زوجي وبنتي.. ردت الروح فيني.. عيلتي ردت لي.. بدينا صفحة جديده واتفقنا نعيش بكالغري.. وربي زهر حياتي من جديد بعبد الرحمن.. صحيح ماتهنيت ولاتدلعت بحمله حبيبي خذا كل هرموناتي الحزينه الي كتمتها بهالفتره الي مرت علي.. بس سعادة عمر وناردين فيه كبيره وخاصه ان حجمه كان كبر النتفه فكان لعبتهم
خواتي اكتب لكم هالشي مو علشان تحزنون علي لا والله ابد بس الدرس الي تعلمته كان صعب والبلاء كان قوي.. لمن تشوفين عيالج تموت بين ايدينج وماتقدرين تسوين شي.. وربي فقط الي يحييهم.. لمن يتألمون وما تقدرون حتى تخففون عنهم ألمهم.. تذكروا انكم ولا شي.. لامال ولا جاه ولاشي ينفعكم.. حزينه ليش؟ والله الذي لا إله إلا هو.. محد شال حزني الا ربي.. ليش نلجأ للغير؟ وليش الحزن اصلا والخوف من المستقبل او المجهول؟
خايفه اولادي يصير فيهم شي.. خايفه زوجي يصير فيه شي.. خايفه عالفلوس..ترا كله يروح بلحظه.. اتقي الله توكلي عليه وشوفي النور بحياتج.. وكل مشكله بحياتج راجعي نفسج وبتلقين الحل قدام عينج بس احيانا الدنيا تحليه بعيونج وتصعب عليج تركه.. قولي اللهم لاعيش الا عيش الآخرة.. بقول وفعل وليس ترديد فقط
قصتي مو فيلم لكن درس قاسي يمكن صقل شخصيه ثانيه كل الي عرفني وانا بنت مو مصدق ان هذي انا الحين.. الحمدلله دوما وابدا.
?
فخوره فيك الله يسعدك ويجعل كل ايامك راحه بال
ردحذف